MARSO 23, 2022
RUSSIA

Ginasuportahan ni Jehova ang Anom ka Matutom nga Kauturan

I-PLAY

Sa indi madugay, ipahibalo sang Industrialniy District Court of the Khabarovsk Territory ang desisyon sini sa kaso ni Sister Maya Karpushkina, ni Brother Stanislav Kim, ni Brother Nikolay Polevodov, ni Sister Svetlana Sedova, kag ni Brother Vitaliy Zhuk kag sang iya asawa nga si Tatyana. Wala pa sing may ginsiling ang piskal kon ano nga sentensia ang gusto niya sa sini nga kaso.

Time Line

Nobiembre 10, 2018

Ginpauntat sang mga awtoridad ang pagtinipon sang mga 55 ka tawo sa isa ka café. Ang tanan nga nagtambong, lakip ang kabataan, gin-interogar, ginkuhaan sang fingerprint, kag ginpiktyuran
Nobiembre 12, 2018

Si Stanislav, si Nikolay, kag si Vitaliy gindala sa pretrial detention center. Ginbutangan sing mga restriksion sa pagbiyahe si Maya, si Svetlana, kag si Tatyana
Enero 14, 2019

Si Nikolay kag si Vitaliy ginpagua sa pretrial detention pero gin-house arrest sila gihapon
Enero 29, 2019

Si Stanislav ginpagua sa pretrial detention pero gin-house arrest sia gihapon
Hulyo 18, 2019

Ginpasaka ang kaso sa Industrialniy District Court of the Khabarovsk Territory
Agosto 2, 2019

Gintapos ang pag-house arrest kay Nikolay
Septiembre 9, 2019

Si Stanislav kag si Nikolay ginpasakaan sing lain nga kaso sa Zheleznodorozhniy District Court of Khabarovsk
Nobiembre 5, 2019

Ginbutangan sing restriksion ang pagbiyahe ni Nikolay
Enero 18, 2020

Gintapos na ang pag-house arrest kay Stanislav kag kay Vitaliy
Pebrero 4, 2020

Ginsentensiahan nga guilty si Stanislav kag si Nikolay sa lain pa gid nga kaso. Ang kada isa sa ila ginsentensiahan sing duha ka tuig nga suspended prison kag probation sang Zheleznodorozhniy District Court of Khabarovsk
Agosto 3, 2020

Ang kaso sa Industrialniy District Court ginbalik sa opisina sang piskal, gani nagdesisyon ang piskal nga iapelar ini.
Septiembre 29, 2020

Ginpamatian sang Khabarovsk Regional Court ang appeal sang piskal. Ginpasugtan si Stanislav kag si Nikolay nga makaistorya sa judge. Nagsiling sila nga ang Russian Federation, pareho sa kalabanan nga pungsod sa kalibutan, nagpirma man sa internasyonal nga mga kasugtanan nga indi sini pagtapakon ang mga kinamatarong kag ang kahilwayan sa pagsimba sang mga pumuluyo sini
Oktubre 12, 2020

Ginsuportahan sang Khabarovsk Regional Court ang desisyon sang Industrialniy District Court kag ang kaso ginbalik naman sa opisina sang piskal
Disiembre 15, 2021

Ginpasaka liwat ang kaso sa Industrialniy District Court

Impormasyon Parte sa Ila

Stanislav Kim

Natawo: 1968 (Khabarovsk, Khabarovsk Territory)

Biograpiya: Sang bata sia, nanamian sia magkanta, kag maghampang sang chess kag dama. Nangin forensic expert sia sadto sa Ministry of Internal Affairs

Nakilala niya ang mga Saksi ni Jehova pagkatapos sia maaksidente sing grabe. Ang iya pagtuon sa Biblia nakabulig sa iya nga mabatuan ang depresyon. Nabawtismuhan sia sang 2004. Napangasawa niya si Olesya sang 2008. May duha sila ka bata

Ang Iya Ginsiling

Ano ang imo ginhimo para padayon nga mangin mabakod ang imo relasyon kay Jehova?

Sang ara ako sa detention wala ako sing Biblia. Gani gintinguhaan ko nga madumduman ang pulo ka bersikulo kada adlaw kag ginapamalandungan ko ini. May ginhimo man ako nga mga goal sa akon mga pangamuyo: nagapangita ako sing pulo ka butang kada adlaw nga pasalamatan ko sa Dios kag pulo ka butang nga pangayuon ko sa iya. Ginasugid ko kay Jehova ang tanantanan kag kon ano gid ang akon ginabatyag.

Nikolay Polevodov

Natawo: 1970 (Khabarovsk, Khabarovsk Territory)

Biograpiya: Nagdaku sia sa isa ka pamilya nga indi relihioso. Isa sia ka electrician

Atheist sia sadto asta nga natun-an niya ang mga ebidensia nga may Dios kag masaligan gid ang Biblia. Nabawtismuhan sia sang 1995. Sang ulihi, napangasawa niya si Tatyana. May bata sila nga lalaki

Ang Iya Ginsiling

Sang ara ka sa detention, ano ang imo ginakabalak-an, kag ano ang imo ginhimo para masolusyunan ini?

Nabalaka gid ako sa amon bata kay pulo pa lang sia ka tuig sina nga tion. . . . Nag-iskedyul ako [kag ang akon asawa] sang Family Worship kada semana. Kon kaisa, nagahimo ako sang crossword puzzle, nagadrowing sang mga piktyur, ukon nagahimo sing mga tsart. May mga tion nga nagapili lang ako sang topiko kag ginahimuan sang mga pamangkot para mabinagbinag namon. Ginapadala ko ini sa balay kada semana.

Paano ka nakumbinsi nga ginabuligan ka gid ni Jehova sa sining mabudlay nga tion?

Nadumduman ko nga isa ka aga, samtang isaisa kami nga gina-check sang mga bantay sa amon mga selda, ang isa ka bantay nagpalapit sa akon. May ginauyatan sia nga libro kag nagsiling sia: “Indi bala nga nagapati ka sa Dios? Basaha ’ni.” Dayon gintalikdan n’ya lang ’ko. Sang gintan-aw ko ang libro nga ginhatag niya, nakita ko nga Bag-ong Kalibutan nga Badbad sang Balaan nga Kasulatan! gali ini . . . Gani sa akon pagtener sa detention, nabasa ko ang pinakamanami nga translation sang Pulong sang Dios.

Svetlana Sedova

Natawo: 1969 (Komsomolsk-on-Amur, Khabarovsk Territory)

Biograpiya: Napatay ang iya tatay sang 3 ka tuig pa lang sia, kag ang iya nanay napatay man sang 14 ka tuig sia. Nag-obra sia sa pabrika sang mga bayo. Kag subong nagaobra sia bilang housekeeper. Nanamian sia magsagod sang mga bulak. Napatay ang iya bana sang gamay pa ang ila mga bata, gani sia ang nagpadaku sang ila duha ka bata nga lalaki kag isa ka bata nga babayi

Sang tin-edyer sia, narealisar niya nga ang aton planeta kag uniberso may maalam nga manunuga. Nabawtismuhan sia sang 1984

Ang Iya Ginsiling

Sa sining mabudlay nga tion, ano ang ginapangabay mo kon magpangamuyo ka?

Ginpangamuyo ko kay Jehova nga pabakuron ako kag pati man ang aton tanan nga kauturan nga nagaantos sang pareho nga mga kabudlayan nga ginaagyan ko. Kon wala ang bulig sang Dios, indi gid naton mabatas ang tanan nga problema sa kalibutan ni Satanas.

Mas kumbinsido pa gid ako subong nga pirme ako ginabuligan ni Jehova. Ang iya Pulong nagasiling: “Mainunungon ka sa tawo nga mainunungon sa imo.”—2 Samuel 22:26.

Tatyana Zhuk

Natawo: 1973 (Khabarovsk, Khabarovsk Territory)

Biograpiya: Maestra sia sadto sa kindergarten kag subong nagaobra sia bilang housekeeper

Sang 19 anyos sia, nangin interesado gid sia sa Biblia. Nakabulig sa iya ang Biblia nga masabat ang iya mga pamangkot parte sa kabuhi. Nabawtismuhan sia sang 1994. Napamana niya si Vitaliy sang 1994

Ang Iya Ginsiling

Paano ka nakapabilin nga kalmado sa sining mabudlay nga sitwasyon?

Ang mga kauturan, lakip ang akon pinalangga nga bana, nagbulig sa akon nga hunahunaon, indi ang mga pagtilaw sa ulihi, kundi kon ano ang matabo sa bag-ong kalibutan. . . . Nakabulig gid ini sa akon.

Wala ko gid napensaran sadto nga tuod gid nga pakalmahon ako ni Jehova. . . . Sang gin-raid ang amon balay, ang isa ka agent namangkot sa akon: “Ngaa kalmado ka gid ’ya? Ginapaabot mo na kami?” Wala gid sia kabalo nga nalipay gid ako sa iya pamangkot!

Vitaliy Zhuk

Natawo: 1972 (Khabarovsk, Khabarovsk Territory)

Biograpiya: Welder sia

Sang 20 anyos sia, ginpaligban niya ang kahulugan sang kabuhi. Bangod ginapangita niya ang kamatuoran, nagtuon sia sing Biblia upod sa mga Saksi ni Jehova kag nasabat ang iya mga pamangkot. Nabawtismuhan sia sang 1994. Sina man nga tuig, napangasawa niya si Tatyana

Ang Iya Ginsiling

Ano ang natun-an mo sa sini nga kabudlayan?

Natun-an ko nga magsalig kay Jehova sa baylo nga hunahunaon ang malain nga mga butang nga mahimo matabo sa ulihi. Kay ang mga ginapamensar ta nga matabo talagsa lang nagakatabo. . . . Natun-an ko man nga apresyahon pa gid ang mga kauturan. Masobra sa walo ka milyon ang aton mga kauturan sa bilog nga duta, kag nabatyagan ko nga malapit gid sila sa aton. Nagabulig sila sa aton paagi sa ila pangamuyo, pagpalig-on, kag sa iban pa nga praktikal nga paagi.

Kabalo kita nga padayon nga buligan ni Jehova ining pinalangga nga mga kauturan kag ang iban pa nga bahin sang “tuman kadaku nga panganod sang mga saksi” sa aton panahon subong.—Hebreo 12:1.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE