MARSO 24, 2022
RUSSIA

Ginasuportahan ni Jehova ang mga Pamilya sang Anom ka Brother nga Ara sa Pretrial Detention

I-PLAY

Sa indi madugay, ipahibalo sang Leninskiy District Court of Rostov-on-Don ang desisyon sini sa kaso ni Brother Aleksey Dyadkin, ni Brother Aleksey Goreliy, ni Brother Nikita Moiseyev, ni Brother Vladimir Popov, ni Brother Yevgeniy Razumov, kag ni Brother Oleg Shidlovskiy. Wala pa sing may ginsiling ang piskal kon ano nga sentensia ang gusto niya sa sini nga kaso.

Time Line

Agosto 8, 2020

Gin-raid sang mga FSB agent ang 17 ka balay sang mga Saksi ni Jehova sa tatlo ka siudad sa Rostov Region kag sa siudad sang Kursk. Si Brother Goreliy, si Brother Moiseyev, si Brother Razumov, kag si Brother Shidlovskiy gin-detain kag ginbutang sa pretrial detention center pagkasunod nga adlaw. Si Brother Popov ginlakip sa federal wanted list
Agosto 12, 2020

Gin-detain sang mga FSB agent si Brother Popov. Ginbutang sia sa pretrial detention pagligad sang duha ka adlaw
Agosto 21, 2020

Pagkatapos nga ginpatawag para kuestyunon, ginbutang sa pretrial detention si Brother Dyadkin
Hunyo 28, 2021

Ginkadtuan sang isa ka abogado ang aton anom ka brother sa pretrial detention center. Ginsugiran nila sia nga mabudlay gid ang ila sitwasyon, kay ang kainiton sang ila mga selda nagalab-ot sa 40 degrees Celsius, gina-molds ang mga dingding, kag may COVID-19 pa ang iban nga priso nga upod nila
Hulyo 21, 2021

Bangod nabudlayan sa pagginhawa si Brother Popov, ginsaylo sia sa isa ka medical unit sa lain nga detention center. Gindala sia sang ulihi sa ospital
Septiembre 30, 2021

Si Brother Popov ginbalik liwat sa pretrial detention pagkatapos nga maospital sing masobra duha ka bulan
Nobiembre 17, 2021

Ginsugdan ang hearing, kag ang anom ka brother wala gihapon makagua sa pretrial detention

Impormasyon Parte sa Ila

Aleksey Goreliy

Natawo: 1980 (Ryazan, Ryazan Region)

Biograpiya: Sang bata pa sia, nanamian sia magtuon parte sa architecture kag history, kag nagahimo man sia sing model nga mga sailboat. Nagaobra sia bilang primary accountant sa kompanya sang habon

Ang iya nanay kag lola ang nagtudlo sa iya sang kamatuoran. Nabawtismuhan sia sang 1995. Napangasawa niya si Inna sang 2011. May isa sila ka bata nga lalaki

Ang Ginsiling sang Iya Asawa nga si Inna b

Ano nga teksto sa Biblia ang nagpabakod sa imo?

Pirme ko madumduman ang ginsiling ni apostol Pablo: “Kay kon maluya ako, mabaskog ako.” (2 Corinto 12:10) . . . Sang gin-raid nila ang amon balay kag gin-detain si Aleksey, na-shock gid ako. Daw tinakluban ako sang langit. Ini nga teksto nagpasalig gid sa akon nga hatagan ako ni Jehova sing kusog nga makabatas kag mangin kalmado para madayaw ko sia.

Nikita Moiseyev

Natawo: 1990 (Dinskaya, Krasnodar Territory)

Biograpiya: Isa sia ka electrician kag nagapangay-o sang mga appliances sa balay. Nabawtismuhan sia sang 2004

Nakilala niya si Sofiya sang 2011 sang nagahimo sia sang alternative civilian service sa isa ka ospital para sa mga bata. Nagpakasal sila sang 2013

Ang Ginsiling sang Iya Asawa nga si Sofiya c

Paano nakabulig ang imo relasyon kay Jehova para makapabilin ka nga kalmado bisan gin-aresto ang imo bana?

Sang una ko pa lang nga nakita ang mga awtoridad sa amon puertahan, nabatyagan ko gid “ang paghidait sang Dios nga labaw sa tanan nga paghangop” nga mabasa sa Filipos 4:7. Nangin kalmado lang ako. Bal-an ko nga insakto ang amon ginahimo . . . kag upod namon si Jehova. Napalig-on gid ako sini. Wala ako makahibalo kon ano ang matabo sa amon pamilya . . . Pamatyag ko magabag-o gid ang tanan nga butang sa akon kabuhi. Pero bisan amo pa sini, wala gid ako mag-panic ukon magbatyag nga ginbiyaan.

Yevgeniy Razumov

Natawo: 1979 (Gukovo, Rostov Region)

Biograpiya: Nagaobra sia bilang plumber

Nag-untat sia sa pagpanigarilyo kag pag-drugs pagkatapos nga makatuon sia sa Biblia upod sa mga Saksi ni Jehova. Nabawtismuhan sia sang 2002

Napangasawa niya si Natalya sang 2005

Ang Ginsiling sang Iya Asawa nga si Natalya e

Paano ka ginbuligan ni Jehova sa sining tion?

Ang akon bana ang nagaobra para sa amon pamilya. Dis-ebol na ako halin sang bata pa kag indi ako makaobra. Wala na sing may masagod sa akon. [Pero], mas nag-athag sa akon subong kon paano ako ginabuligan ni Jehova. Kis-a ginahimo niya ini sa wala ko gid ginapaabot nga paagi amo nga nalipay gid ako kag napabakod, kag narealisar ko nga wala gali ako nagaisahanon. . . . Bangod sini nagsalig pa gid ako nga nagaulikid gid sia sa akon kag indi gid niya ako pagpabay-an.

Oleg Shidlovskiy

Natawo: 1969 (Gornyatskiy, Rostov Region)

Biograpiya: Sang pamatan-on sia, mahilig sia sa sports, ilabi na sa basketball. Nangin maestro sia sa physical education

Nagsugod sia sa pagtuon sa Biblia upod sa mga Saksi ni Jehova sang nagaeskwela sia sa university. Nabawtismuhan sia sang 1991

Napangasawa niya si Natalya sang 1998. May duha sila ka bata nga babayi

Ang Ginsiling sang Iya Asawa nga si Natalya f

Ano ang nakabulig sa imo nga mangin positibo samtang napriso ang imo bana?

Gindugangan ko pa gid ang pagtuon sing personal para mabuligan ako nga mabatas ang akon kasubo. Indi ako makapakig-upod sa iban bangod sa pandemic, gani para indi ako ma-depress, damo ako sing ginaobra sa sulod sang balay.

Ginaatipan man ako sang akon Amay [sa langit] kag sang mga kauturan. Kon wala sila, indi gid ako makabatas. Nagkadto gid diri dayon ang mga kauturan kag namangkot kon ano ang mabulig nila sa akon.

Padayon naton nga ginapangamuyo kay Jehova ining mga kauturan kag ang ila pamilya. Nagasalig kita nga hatagan sila ni Jehova sing pagtuo kag kusog nga kinahanglan nila.—Roma 15:30.

a b c d e f Bangod ara sa pretrial detention ining anom ka brother, indi sila puede interbyuhon.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE