Sang Abril 9, 2019, ang Surgut City Court nagmando nga hilwayon si Brother Yevgeniy Fedin kag si Brother Sergey Loginov nga ginpriso bisan wala pa mabista. Ginbasura sini nga korte ang pangabay sang mga awtoridad sa Russia nga palawigon ang pagpriso sa ila. Bisan pa padayon nga ginaimbestigahan ang mga kaso kriminal nga ginpasaka batok sa sini nga mga brother, ginpagua na sila sa prisuhan sang Abril 11.

Si Brother Fedin kag si Brother Loginov ginpriso sugod sang Pebrero 15, 2019, sang gin-aresto sila pagkatapos sang pagpang-raid sa mga balay sa siudad sang Surgut. Sina nga tion, ginpasakaan sang mga awtoridad sing kaso kriminal ang 19 ka Saksi. Ang tatlo sa ila, si Yevgeniy kag si Sergey, kag si Brother Artur Severinchik, ginpriso bisan wala pa mabista. Sang Marso 15, si Artur ang una nga ginpagua.

Sang nagpang-raid sang Pebrero, gin-torture sang mga pulis ang aton pito ka brother, lakip si Brother Loginov. May ginpasaka na nga reklamo sa European Court of Human Rights parte sa sining mapintas nga pagtrato. Ini nga reklamo padayon pa nga ginabinagbinag.

Nagasalig kami nga padayon nga ipakita ni Jehova nga ginatalupangod gid niya ang aton mga pangamuyo samtang ginapabakod niya ang aton matutom nga mga kauturan sa Russia.—Salmo 10:17.