Sang Marso 7, 2019, ginbaliskad sang Appeals Court sang Khanty-Mansiysk, Russia, ang desisyon sang Surgut City Trial Court nga prisuhon si Brother Artur Severinchik. Ginpriso sia bisan wala pa mabista, kag sang Marso 15 lang sia ginpagua sa prisuhan.

Si Brother Severinchik isa sa tatlo ka brother nga ginpriso bisan wala pa mabista sang Pebrero 17, sa tapos nga ginhimo ang pagpang-raid sa mga siudad sang Surgut kag Lyantor. Wala ginpasugtan sang korte nga paguaon ang duha pa ka brother nga sanday Yevgeniy Fedin kag Sergey Loginov.

Ini nga sitwasyon ginabantayan gid sang bilog nga kalibutan. Ang European Court of Human Rights nagmando nga si Brother Loginov, nga gin-torture sang ginpriso sia, ipaeksamin sa mga doktor nga wala nagatrabaho sa gobierno.

Nagapasalamat gid kita nga ginpagua na si Brother Severinchik. Padayon kita nga nagapangamuyo nga ang aton kauturan nga napriso sa Russia magsalig kay Jehova, kag kabay nga dumdumon nila nga ang iya pagsuporta ‘indi gid malingkang.’—Salmo 16:8.