PEBRERO 13, 2023
RUSSIA

Ginhingabot ang Tatlo ka Pamilya sa Yaroslavl

I-PLAY

Sa indi madugay, ipahibalo sang Dzerzhinsky District Court of Yaroslavl ang desisyon sini sa kaso nanday Brother Pyotr Filiznov; Brother Aleksandr Kuznetsov kag sang iya asawa nga si Sister Mariya Kuznetsova; kag ni Brother Andrey Vyushin. Wala pa sing may ginsiling ang piskal kon ano nga mga sentensia ang gusto niya sa sini nga kaso.

Impormasyon Parte sa Ila

Aleksandr Kuznetsov

Natawo: 1982 (Moscow, Moscow Region)

Biograpiya: Nag-obra sia bilang tutor sa English kag Math

Nagtuon sia sa Biblia sang Abril 2000. Nagdayaw sia sa gugma nga ginapakita sang mga Saksi ni Jehova. Nabawtismuhan sia sang 2002

Napangasawa niya si Mariya sang 2017. Na-diagnose sia nga may cancer sang nakagua sia sa pretrial detention

Ang Iya Ginsiling

Ano ang nakabulig sa imo nga mangin malipayon gihapon bisan pa may masakit ka kag ginahingabot pa?

Pirme ako ginaluyahan sing buot, kag kon kis-a daw wala na ako sang kusog nga magbatas. Pero si Jehova pirme nagahatag ‘sang lulutsan’ para sa akon. (1 Corinto 10:13) Nakabulig man sa akon ang pagpangamuyo nga ginasugid ko sa iya kon ano gid ang akon nabatyagan, kag kon kaisa nagahibi pa gani ako samtang nagapangamuyo. Napabakod man ako sang pagkanta sang aton mga ambahanon, pagbasa kag pagtuon sang Biblia, kag pagpamalandong parte sa mga promisa ni Jehova sa palaabuton. Ginatinguhaan gid namon sang akon asawa nga pabakuron ang amon mga kauturan. Kon ginahimo namon ina, wala na kami nagakabalaka sing sobra sa amon mga problema. Ang pinakaimportante, ginapasalamatan gid namon kon paano ginagamit ni Jehova ang iya balaan nga espiritu para paumpawan kami kag hatagan sing kalinong.

Mariya Kuznetsova

Natawo: 1988 (Sharypovo, Krasnoyarsk Territory)

Biograpiya: Personal services ang iya obra

Ginpadaku sia sang iya ginikanan nga mga Saksi ni Jehova. Nalipay sia magtuon sa mga tagna sa Biblia. Nabawtismuhan sia sang 2002

Napamana niya si Aleksandr sang 2017

Ang Iya Ginsiling

Ano nga teksto ang nakapalig-on gid sa imo?

Ang isa sa paborito ko nga teksto amo ang Colosas 1:11: “Kabay nga mapabakod kamo sang kusog halin sa iya mahimayaon nga gahom agod makabatas kamo sing bug-os nga may pagpailob kag kalipay.” Ang akon eksperiensia nakakumbinsi sa akon nga kon magsalig ako sing bug-os kay Jehova kag pangayuon ang iya suporta, buligan gid niya ako pirme. Ginapakitaan niya sang mainunungon nga gugma ang matutom niya nga mga alagad sa sarisari nga paagi, kag pirme gid niya ipakita ang kaluoy.

Andrey Vyushin

Natawo: 1975 (Yaroslavl, Yaroslavl Region)

Biograpiya: Ginpadaku sang iya nanay kag lola. Ang iya obra pagmentinar sang mga network sang computer. Ginaatipan niya ang iya dis-ebol nga nanay

Nakilala niya ang mga Saksi ni Jehova sang nagtuon sa Biblia ang suod niya nga abyan. Ginsabat sang mga Saksi ang iya mga pamangkot, kag nakita niya nga ginasunod gid nila ang ila ginatudlo. Nabawtismuhan sia sang 1995

Napangasawa niya si Anastasiya sang 2013. May isa sila ka bata nga babayi

Ang Iya Ginsiling

Paano ninyo napabakod sang imo asawa ang iban bangod sang inyo naeksperiensiahan?

Napabakod gid kami sang akon asawa kon paano ginbatas ni Dennis Christensen ang mga pagtilaw nga iya naagyan. Isa sia sa una nga napriso, pero matutom gid sia pirme. Ang iya halimbawa nakahatag sa amon sang kompiansa nga masarangan man namon ang mga pagtilaw. Kon maistorya namon subong ang mga kauturan nga nahadlok, ginapalig-on gid namon sila kag ginasilingan nga indi ini pareho ka makahaladlok sa ila ginahunahuna. Ginapahanumdom namon ang amon mga abyan nga indi magpakulba paagi sa pag-imadyin kon ano ang matabo kon hingabuton sila. Ang mas maayo nga himuon amo nga tan-awon ang paghingabot nga isa ka kahigayunan para mabal-an kon daw ano kabakod ang aton pagtuo.

Pareho sining apat ka matutom nga alagad ni Jehova, kumbinsido kita nga ‘makasalig man kita kay Jehova kag indi matay-ug.’—Salmo 125:1.

Time Line

Abril 13, 2021

Ginbutang sa temporary detention sa tapos gin-raid sang mga awtoridad ang ila balay
Abril 15, 2021

Gin-detain samtang nagahulat sang pag-hearing sa ila
Hulyo 14, 2021

Ginpagua sila pero ginbutangan sing restriksion ang ila pagbiyahe
Septiembre 9, 2022

Ginsugdan ang hearing

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE