Sang Lunes, Oktubre 4, 2021, ginkastigo kag ginmaltrato sang mga pulis sang Armed Russian OMON a sanday Brother Anatoly kag Sister Greta Razdobarov kag sanday Brother Nikolay kag Sister Liliya Merinov. Natabo ini nga pagpamintas sang gin-raid sang mga pulis ang 12 ka balay sang mga Saksi ni Jehova sa siudad sang Irkutsk. Gin-detain sang mga pulis ang pila ka brother samtang nagakatabo ang pagpang-raid.

Sang alas 6:00 sang aga, ginsulod sang mga pulis ang balay ni Anatoly kag ni Greta. Gin-uyatan sang mga pulis ang buhok ni Greta kag ginganoy sia pakadto sa isa ka kuarto, ginbaklid sia kag ginpusasan, kag pila ka beses sia nga ginsakit.

Si Anatoly naman ginlampos sang mga pulis sa salog, ginbaklid kag ginpusasan, kag ginsipa sa ulo kag sa tiyan. Dayon gin-uyatan sang mga pulis ang iya nakabaklid nga mga kamot para patindugon sia. Nagaagunto sa kasakit si Anatoly kay nagliw-as ang iya abaga bangod sa kabug-aton sang iya lawas. Ginhanot man sang mga pulis ang iya kamot samtang ginapilit nila sia nga mag-aku nga nakahimo sia sing krimen kag isugid ang mga impormasyon parte sa iya mga kauturan. Gin-torture man sia sang mga pulis. Ginpilit nila nga idasok ang botelya sa iya buli. Naglawig sing sobra walo ka oras ang pag-raid sa balay sang mag-asawa nga Razdobarov.

Sang ginsulod sang mga pulis ang balay nanday Nikolay kag Liliya Merinov, ginlampusan nila si Nikolay sang mabug-at nga butang. Natumba sia kag nalipong. Sang naumpawan sia, nakita niya nga ginpungkuan sia sang isa ka pulis kag ginakastigo. Nagkalaungab ang unto ni Nikolay bangod sa pagkastigo sang pulis. Gin-uyatan naman si Liliya sa iya buhok kag ginganoy halin sa iya katre kag ginpusasan. Ginsakit sia anay sang mga pulis antes ginpasugtan nga mag-ilis.

Suno sa Russian Criminal Code, isa gid ka krimen ang ginhimo nga pagpamintas sang mga pulis. Dugang pa, salabton man sang Russian Federation nga tumanon ang mga kasuguan sang pila ka internasyonal nga mga organisasyon. Ini nga mga organisasyon amo ang nagahimo sang mga kasuguan para proteksionan ang mga tawo sa pagpang-torture. Gani, tinguhaan gid sining duha ka mag-asawa nga magpasaka sing kaso sa mga korte sa Russia kag sa internasyonal nga mga korte.

Pagligad sang duha ka adlaw pagkatapos sang pagpang-raid, anom pa ka brother ang ginbutang sa pretrial detention base sa desisyon sang korte: si Yaroslav Kalin, si Sergey Kosteev, si Nikolay Martynov, si Mikhail Moish, si Aleksey Solnechny, kag si Andrey Tolmachev. Mga 300 ka kauturan ang nagbiyahe para magtambong sa hearing sa korte. Ginhimo nila ini para ipakita ang ila pagsuporta sa ila mga kauturan nga nakaeksperiensia sini nga pagmaltrato.

Sa tanan namon nga pinalangga nga mga kauturan sa Russia, masiling man namon sa inyo ang ginsiling ni Pablo sa mga taga-Tesalonica: “Ginapabugal namon kamo sa mga kongregasyon sang Dios bangod sang inyo pagbatas kag pagtuo bisan pa sang mga paghingabot kag mga kabudlayan nga inyo ginaantos.”—2 Tesalonica 1:4.