Ginkondenar gid sang United States kag sang mga 30 ka pungsod sa Europe ang organisado nga paghingabot kag pag-torture sa aton mga kauturan sa Russia. Natabo ini sang Hulyo 23, 2020 sa isa ka miting nga gin-organisar sang Permanent Council * sang Organization for Security and Co-operation in Europe (OSCE).

Sa iya mensahe sa nagtipon nga mga opisyal, ang political counselor sang U.S. Mission sang OSCE nga si Ms. Lane Darnell Bahl, nagsiling: “Ang United States kag ang iban pa nga nagtambong subong nagakondenar kag indi mag-untat sa pagkondenar sa mga report sang ilegal nga pagpang-raid sang mga pulis, wala sing basihan nga pagpang-aresto kag pagpriso, pagpamatbat nga guilty nga nagaresulta sa asta sa anom ka tuig nga pagkapriso, kag pag-torture nga ginahimo sang mga awtoridad sa Russia sa mga Saksi ni Jehova.”

Ang mga opisyal nagakabalaka gid sa mga report kasan-o lang parte sa pagpang-raid nga ginhimo sang mga awtoridad sa Russia sa sobra 100 ka balay sang mga Saksi ni Jehova sa Voronezh Region. “Makatulublag gid ang kasangkaron sini nga paghingabot kontra sa mga miembro sang isa ka gamay nga grupo sang mahidaiton nga relihion,” siling ni Ms. Bahl.

Ang deputy head sang United Kingdom (UK) Delegation, nga si Ms. Nicola Murray, naghambal man nga nabalaka sia bangod ang “nagadamo nga pagpang-raid, kag ang dulungan nga pagpang-raid sa mga balay, nagapakita sang isa ka organisado nga paghingabot sa mga Saksi ni Jehova.” Nagsiling pa gid sia: “Ang pila sa mga ‘ebidensia’ kuno kontra sa mga gin-imbestigahan kag ginhingabot nagalakip sang ila lamang paghimo sang mga hilikuton sang ila relihion.”

Nagsiling man si Ms. Bahl nga sayop ang ginahambal sang mga awtoridad sa Voronezh nga ang mga Saksi nga ginpriso bisan wala mabista, guilty sa sala nga “ilegal nga mga hilikuton.” Nalakip sa sini ang pagtipon sang mga report kag iban pa nga dokumento sa kompyuter, pag-organisar sang mga grupo, kag paggamit sang videoconference sa paghiwat sang ila mga miting. Suno kay Ms. Bahl, ining akusasyon sang mga awtoridad sa Russia “wala sing basihan kag makahuluya.” Nagsiling sia: “Ti, ginahimo ko man inang ginasiling nila nga ‘ilegal nga mga hilikuton’ adlaw-adlaw.” Nagsiling pa gid sia nga ang mga miembro sang Russian Delegation nga nagatambong sa miting sang OSCE paagi sa videoconference “guilty man sa sina nga mga hilikuton.”

Sa isa ka joint statement, ang 27 ka pungsod nga miembro sang European Union (EU), upod sa walo pa ka pungsod nga indi miembro sini, nagsiling: “Indi lang makaisa nga nabatian namon nga nagsiling ang Russian Delegation sa Permanent Council nga ang mga Saksi ni Jehova hilway nga makahimo, kag padayon nga makahimo, sang mga hilikuton sang ila relihion kag ginagarantiyahan sang Russian Federation ang ila kahilwayan sa relihion ukon pagpati. Pero, padayon kami nga makabaton sang madamo nga report parte sa mga Saksi ni Jehova nga gina-raid ang ila mga balay, ginapriso bisan wala sing ginpasaka nga kaso, kag ginaimbestigahan bilang mga kriminal. Baliskad gid ini sa ginasiling sang Russian Federation.”

Ang EU Delegation nagsiling pa gid: “Ang tanan nga tawo, lakip ang mga Saksi ni Jehova, dapat mahidaiton nga makahimo sang ila mga kinamatarong bilang tawo, lakip ang kinamatarong sa kahilwayan sang relihion ukon pagpati, kahilwayan sa pagpakig-upod kag mahidaiton nga pagtipon, kag kahilwayan sa paghambal, nga wala sing diskriminasyon, suno sa ginagarantiyahan sang Konstitusyon sang Russian Federation [kag] sang ginpangako kag obligasyon sang Russia sa OSCE base sa international law.

Gintapos ni Ms. Murray ang iya mensahe sa panawagan nga untaton ang paghingabot sa mga Saksi ni Jehova sa Russia.

Ginpangabay ni Ms. Bahl ang Russia nga: (1) untatan ang pag-imbestigar sa mga Saksi ni Jehova, (2) ibalik sa mga Saksi ni Jehova ang ila headquarters nga ginkuha sang Russia, kag (3) buy-an gilayon ang tanan nga Saksi nga ara sa prisuhan.

Indi ini ang una nga bes nga ginkondenar sang mga organisasyon sa bilog nga kalibutan ang paghingabot sang Russia sa aton mga kauturan. Ginpaandaman na ang Russia. Nahibaluan sang kalibutan ang ila mapintas nga paghingabot sa aton mga kauturan. Ang mas importante, nahibaluan naton nga nakita ni Jehova ang nagakatabo sa aton mga kauturan sa Russia. (Salmo 37:18) Sigurado nga padayon nga pakamaayuhon sang aton mahigugmaon nga Amay ang ila katutom, kaisog, kag pagbatas.—Salmo 37:5, 28, 34.