Ang grupo sang mga eksperto sang United Nations (UN) parte sa kinamatarong sang tawo nagpagua sang 15 ka pahina nga opinyon nga nagasiling nga ginlapas sang Russia ang international law sang gin-aresto sini kag ginpriso ang 18 ka Saksi ni Jehova sa sarisari nga siudad sang Mayo 2018 asta Hulyo 2019. Gusto gid sining grupo sang mga eksperto nga ang mga Saksi nga ara gihapon sa prisuhan buy-an gilayon nga wala sang bisan ano nga kondisyon.

Ang una nga kopya sang opinyon sini nga grupo ginpagua sang Mayo 15, 2020. Ang opisyal nga bersion sini nga opinyon ibutang sa website sang UN.

Amo ini ang ikatlo nga tion sang nagligad nga tuig nga nagpagua ini nga grupo, ang Working Group on Arbitrary Detention, sang ila konklusion pabor sa aton mga kauturan. Sa ila pinakaulihi nga opinyon, ginkondenar sang Working Group ang madamo nga klase sang pagmaltrato nga ginhimo sang Russia batok sa aton mga kauturan.

Parte sa paggamit sang mga awtoridad sing “sobrasobra nga puersa” sa pag-aresto sa mga Saksi, ang Working Group nagsiling nga “wala sing basihan ang ginpanghimo sang mga pulis.” Ginpadaku man sini nga “wala dapat gin-aresto kag ginpriso nga wala mabista [ang mga Saksi], kag wala dapat sila ginbista kag indi sila dapat pagbistahon.”

Ang grupo wala gid nagaugyon nga ang mga Saksi nagahimo sang extremist nga mga hilikuton. Nagpaathag ini nga gingamit lamang sang mga kauturan sa mahidaiton nga paagi “ang ila kinamatarong sa kahilwayan sang relihion.”

Sa sini nga opinyon, ginkondenar man sang grupo ang paagi sang pagbista sa aton mga kauturan. Halimbawa, sang ginbista ang duha ka sister, ginbutang sila sa mga selda sa sulod sang korte. Ang Working Group nagpaathag nga ginakilala sang international law nga ang tanan nga tawo may kinamatarong “nga kabigon nga wala sing sala asta nga mapamatud-an nga guilty base sa kasuguan.” Bangod sini, ang aton mga sister wala dapat “ginkadenahan ukon ginbutang sa mga selda samtang ginabista ukon ginpresentar sa korte nga daw makatalagam nga mga kriminal.”

Gusto gid sang Working Group nga dulaon sang Russia ang criminal record sining 18 ka Saksi kag bayaran sila sang danyos nga base sa ginapatuman sang international law. Nagpanawagan man sila sa Russia nga “siguraduhon nga maimbestigahan sing maayo kag sing patas ang tanan nga natabo nga nagresulta sa sining mga inhustisya” kag “himuon ang tanan nga kinahanglanon para manabat ang mga naglapas sa mga kinamatarong sang [mga Saksi].”

Ini nga opinyon nagsiling nga ang 18 ka Saksi “nalakip sa mas nagadamo subong nga mga Saksi ni Jehova sa Russia nga gin-aresto, ginpriso, kag ginkasuhan bilang kriminal bangod lamang sang ila pagpanghikot base sa ila kahilwayan sa relihion,” nga isa ka kinamatarong nga ginaproteksionan sang kasuguan sang mga pungsod sa diin miembro ang Russia. Gani, bisan pa ining opinyon nagapokus lang sa 18 ka kauturan, ang Working Group maathag nga nagasiling nga ang ila rekomendasyon “naaplikar sa tanan nga pareho man ang sitwasyon.”

Ining opinyon nga ginhimo sang Working Group wala nagagarantiya nga makagua sa prisuhan ang aton mga kauturan sa Russia, pero nagalaum kita nga makabulig ini sa ila sitwasyon. Ginahulat naton ang sabat sang Russia. Samtang may kaisog nga ginabatas sang aton mga kauturan sa Russia ang paghingabot, kabalo kita nga ang aton mahigugmaon nga Amay nga si Jehova padayon nga magahatag sa ila sing kalipay kag paghidait bangod sa ila pagsalig sa iya.— Roma 15:13