Sang Huebes, Nobiembre 14, 2019, ginpamatbatan sang Ordzhonikidzevskiy District Court sang Perm’ si Brother Aleksey Metsger kag ginmultahan sia sing 350,000 rubles (ukon mga $5,460 U.S.). Sia amo ang ika-12 nga brother sa Russia nga ginpamatbatan sini nga tuig bangod sang sala nga akusasyon nga nagahimo sia sang extremist nga hilikuton bisan pa ang iya ginahimo amo ang pagsimba lamang sa iya Dios kag ang pagsugid sa iban parte sa iya ginatuuhan. Iapelar sang abogado ni Brother Metsger ang desisyon sang korte.

Sang Abril 25, 2019, ginpasakaan si Brother Metsger sang kaso kriminal bangod isa sia sa mga Saksi ni Jehova. Ang pila sa mga ebidensia nga gingamit amo ang pagpakig-istorya ni Brother Metsger parte sa iya relihion sa mga tawo nga nagrekord sang ila pag-istoryahanay.

Ang pagbista sa iya nagsugod sang Oktubre 14, 2019. Nagpanugda ang piskal nga prisuhon si Brother Metsger sing tatlo ka tuig. Bisan pa wala ginsentensiahan si Brother Metsger nga mapriso, nabalaka kita nga ginpamatbatan si Brother Metsger nga nakasala. Kag bangod sini, mahimo nga madamo pa nga kauturan ang makasuhan bangod sang ila pagtuo.

Bisan pa padayon nga ginahingabot sang awtoridad ang aton mga utod sa Russia bisan wala sing kabangdanan, kabalo kita nga padayon sila nga paumpawan kag pabakuron ni Jehova.—Salmo 119:76, 161.