Sa indi madugay, ipahibalo sang Surgut City Court of the Khanty-Mansi Autonomous Area ang desisyon sini sa kaso sang 17 ka brother kag isa ka sister. Lakip sa ila sanday Brother Yevgeniy Fedin, Brother Artur Severinchik, kag Brother Timofey Zhukov. Wala pa sing may ginsiling ang piskal kon ano nga sentensia ang gusto niya sa sini nga kaso.

1. Pebrero 15, 2019

   Gin-raid sang mga pulis ang madamo nga mga balay sang mga Saksi ni Jehova sa Surgut kag sa malapit nga mga siudad. Pito ka brother ang nagsiling nga gin-torture sila sang gin-interogar sila. Tatlo ka brother ang ginbutang sa pretrial detention, lakip si Yevgeniy Fedin kag si Artur Severinchik

2. Marso 7, 2019

   Nagmando ang isa ka appeals court nga paguaon si Artur sa pretrial detention pagkatapos sang 21 ka adlaw

3. Abril 11, 2019

   Si Yevgeniy ginpagua sa pretrial detention pagkatapos sang mga duha ka bulan. Ginbutangan sang restriksion sang korte ang iya pagbiyahe, pagkomunikar kag paggamit sang internet

4. Enero 16, 2020

   Ginmanduan sang isa ka judge si Brother Timofey Zhukov nga magkadto sa isa ka psychiatric hospital para magpa-eksamin. Nagsiling ang mga imbestigador nga ang isa ka rason sini kay indi sia magsabat sang ginainterogar sia. Ang indi pagsabat sa interogasyon isa ka kinamatarong nga ginagarantiyahan sa idalom sang Article 51 of the Constitution of the Russian Federation. Gin-apelar ni Timofey ang mando

5. Pebrero 5, 2020

   Gin-aresto sang mga pulis si Timofey sang nagapagua sia sa korte. Bisan naka-pending pa ang iya pag-apelar sa mando sang korte, gindala sia sang mga opisyales sa isa ka psychiatric hospital sa Yekaterinburg nga mga 1,200 ka kilometro ang kalayuon kag 14 ka adlaw sia nga ginpatener didto

6. Marso 5, 2020

   Ang isa ka judge sang appeals court nagsiling nga ilegal ang pagpatener didto kay Timofey

7. Oktubre 19, 2021

   Ang appeals court nagmando nga bayaran si Timofey bilang danyos bangod sa ilegal nga pag-detain sa iya

8. Nobiembre 12, 2021

   Sa tion sang preliminary hearing, ang mga abogado nga nagadepensa sa mga ginaakusahan nagpresentar sang ebidensia sang ilegal kag indi makatarunganon nga buhat nga ginhimo sang mga awtoridad. Nalakip sa sini ang pag-torture, pagpresentar sang indi matuod nga ebidensia, kag ang paggamit sang may ginadampigan nga mga eksperto. Ginpangabay sang mga ginaakusahan nga ibalik ang kaso sa piskal

9. Nobiembre 15, 2021

   Ang isa ka judge nagsiling nga may mga bahin sang imbestigasyon nga nagsupak sa kasuguan, pero nangindi sia nga ibalik sa piskal ang kaso

Nagasalig kita nga si Jehova padayon nga magaupod kay Yevgeniy, kay Artur, kay Timofey, kag sa iban pa nga mga kauturan nga ‘nagatuon sang ila mga mata sa mga butang nga indi makita’ samtang ginabatas nila ang paghingabot.—2 Corinto 4:17, 18.