HULYO 7, 2022
RUSSIA

Ginpadayon ni Yevgeniy Zinich ang Katutom sang Iya Pamilya

I-PLAY

Sang Hunyo 27, 2022, ginsentensiahan sang Oktyabrskiy District Court of Krasnoyarsk si Brother Yevgeniy Zinich sang anom ka tuig nga pagkapriso. Ginpriso sia dayon.

Time Line

Disiembre 11, 2020

Gin-raid ang balay ni Yevgeniy
Enero 21, 2021

Ginsugdan ang kaso kontra sa iya
Oktubre 19, 2021

Ginkasuhan sia nga nagaorganisar sang mga hilikuton sang isa ka extremist nga organisasyon
Oktubre 20, 2021

Ginbutangan sang restriksion ang iya pagbiyahe
Disiembre 14, 2021

Ginsugdan ang hearing

Impormasyon Parte sa Iya

Yevgeniy Zinich

Natawo: 1966 (Nazarovo, Krasnoyarsk Territory)

Biograpiya: Ang iya mga ginikanan kag ang iya lolo kag lola ginhingabot bangod sa ila pagtuo sang panahon sang Soviet

Nabawtismuhan sia bilang isa sa mga Saksi ni Jehova sang 1982. Napangasawa niya si Mariya sang 1988, may isa sila ka bata nga babayi. Napatay si Mariya antes pa matapos ang kaso

Ang Iya Ginsiling

Bangod sa ila pagtuo ginhingabot ang imo lolo kag lola, ang imo mga ginikanan, kag ginhingabot man ang lolo kag lola kag mga ginikanan sang imo asawa. Paano ang ila halimbawa nakabulig sa imo?

Sang una, pirme gid ginahingabot ang mga Saksi ni Jehova. Madamo gid ako sing natun-an sa reaksion sang akon lolo kag lola kag sang akon mga ginikanan sang ginhingabot sila. Wala gid sila naakig ukon naugot sa nagakatabo. Naintiendihan gid sang tanan nga bangod matuod sila nga mga Cristiano, paabuton gid nila ang paghingabot. Kon dumdumon ko ang halimbawa sang akon mga ginikanan, narealisar ko nga mabakod ang ila pagtuo bangod naintiendihan nila sing maayo ang kamatuoran kag malapit gid ang ila relasyon sa Dios. Madumduman ko gihapon nga sang bata pa ako, pirme ko makita si Tatay nga nagaluhod kag nagapangamuyo.

Pareho man sa ila ang mga ginikanan sang akon asawa nga si Mariya. Ang kamatuoran sa Biblia indi lang bahin sang ila kabuhi, kundi amo gid ini ang ila kabuhi. Gintudluan nila sia kon paano pabakuron ang iya pagtuo, kon paano basahon kag tun-an ang Biblia sing regular, kag kon paano ipakita ang sinsero nga pag-ulikid sa mga kauturan sa kongregasyon. Bisan sang madali na lang mapatay si Mariya, sang maluya na sia kag nagapabulong, gusto niya gihapon nga buligan ang iban nga pabakuron ang ila pagtuo. Pirme niya ginapahanumdom sa akon ang mga nagakinahanglan sang pagpalig-on.

Ano ang nakabulig sa imo nga mabatas ining mabudlay nga sitwasyon?

Gusto ko gid nga may mahimo ako pirme para kay Jehova kag sa akon mga kauturan. Amo ini ang nakabulig sa akon nga makabatas. Asta sa akon masarangan, ginabuligan ko gid ang akon mga kauturan nga ara sa prisuhan. Kanami batyagon nga ginagamit ako ni Jehova para buligan sila kag mabatyagan ko gid nga may mahimo ako. Natun-an ko man kon paano ginaatipan ni Jehova ang kada isa sa aton.

Paagi sa kaayo kag kaalwan nga ginpakita sang mga kauturan sa akon, mas nag-athag pa gid sa akon nga palangga ako ni Jehova kag nalipay sia sa akon. Mas naapresyar ko pa gid ang kaayo sang mga kauturan, labi na gid sining nagligad nga mga binulan, bangod grabe gid ang akon kasubo sang napatay si Mariya.

Nagasalig gid kita nga padayon nga mabatyagan ni Yevgeniy ang pagpalangga kag paumpaw halin kay Jehova samtang maisugon niya nga ginabatas ining mabudlay nga mga sitwasyon pareho sa ginhimo sang iya pamilya sadto.—Salmo 86:17.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE