Sang Hunyo 14, 2024, ginpagua sanday Brother Denis Antonov kag Brother Aleksandr Korolev sa prisuhan sa Russia sa baryo sang Molochnitsa. Sang Agosto 25, 2022, pareho sila nga gindesisyunan sang korte nga guilty kag ginsentensiahan sang duha ka tuig nga pagkapriso. Nakompleto na nila ang ila sentensia bangod napriso na sila sa pretrial detention antes pa sila nasentensiahan.

Ginsugid sang asawa ni Denis nga si Olga, kon ano ang nakabulig sa iya kag kay Denis sang naglayuay sila: “Ginpalig-on namon ang isa kag isa paagi sa mga sulat kag paglakip sang mga teksto sa Biblia. Ang isa ka teksto nga nakabulig gid sa amon amo ang Manugwali 8:12, diin nagsiling si Solomon: ‘Nakahibalo ako nga maayo ang madangatan sang mga nagakahadlok sa matuod nga Dios.’ Ini nga teksto nagpasalig sa amon nga kon padayon kami nga mag-alagad kay Jehova kag indi mag-untat, hatagan niya kami sang kabakod nga makabatas.”

Sa katapusan nga ginsiling ni Aleksandr sa korte antes sia ginsentensiahan, ginkumparar niya ang iya eksperiensia sa kay manalagna Daniel. Sia nagsiling: “Bisan pa nga ginapahog sia nga patyon, mabakod gid ang pagtuo ni Daniel amo nga wala gid sia mag-untat sa pagpangamuyo kay Jehova nga Dios. Padayon ko man nga pangabayon ang Dios nga hatagan ako sang pareho sina nga pagtuo nga indi mapaluya sang bisan ano nga paghingabot.”

Nagakalipay kita upod kay Denis kag Aleksandr bangod nakaupod na nila liwat ang ila mga pamilya. Ang ila mga eksperiensia makapasalig sa aton sang promisa sa Salmo 4:3: “Dumduma ninyo nga ginapadunggan ni Jehova ang mainunungon sa iya; mamati si Jehova kon manawag [kita] sa iya.”