Sang Pebrero 9, 2024, ginpagua sa prisuhan si Brother Vilen Avanesov pagkatapos sang halos lima ka tuig nga pagkapriso. Gin-aresto kag gin-detain si Vilen sang Mayo 2019. Ginsentensiahan sia sing anom ka tuig nga pagkapriso sang Hulyo 29, 2021. Bangod ginbutang na sia sa pretrial detention, indi niya kinahanglan nga tapuson ang iya anom ka tuig nga sentensia. Ang iya bata nga lalaki nga si Arsen gin-aresto man kag ginpriso dungan sa iya. Pero si Arsen ara gihapon sa prisuhan.

Wala madugay pagkatapos ginpagua si Vilen, nagsiling ang iya asawa nga si Sister Stella Avanesova: “Ang una nga duha ka tuig kag tunga nga ara si Vilen sa pretrial detention amo gid ang pinakamabudlay para sa amon. Nabalaka gid ako. Wala kami ginpasugtan nga makakomunikar kay Vilen, bisan sa sulat. Dugang pa, pareho nga ara sa prisuhan ang akon bana kag bata nga lalaki, gani wala ko kabalo kon paano ako makapangita sang kuarta para sa amon mga galastuhan.”

Bisan pa sa sini nga mga kabudlayan, pirme gid nabatyagan ni Vilen kag Stella ang bulig ni Jehova. Siling pa ni Stella: “Ginsilingan ako ni Vilen nga kada magbiyahe sia pakadto sa korte para i-hearing, makita niya ang mga kauturan nga nagatipon sa korte. Para sa iya, ebidensia gid ato sang pag-atipan ni Jehova. Sa akon naman bahin, ginasigurado gid ni Jehova nga may ara ako sang tanan ko nga kinahanglanon. Kumbinsido gid ako nga ginasuportahan gid ni Jehova ang mga nagasalig sa iya.”

Nagakalipay kita para kay Vilen kag Stella kay updanay na sila liwat. Kag padayon naton nga ipangamuyo ang ila bata nga lalaki nga si Arsen, kag ang tanan nga kauturan nga ara pa sa prisuhan. Nagasalig kita nga si Jehova padayon nga mangin kapawa, kaluwasan, kag kuta sang mga matutom sa iya.—Salmo 27:1.