Sang Nobiembre 3, 2023, ginpagua sa prisuhan si Brother Aleksandr Shevchuk pagkatapos sang iya sentensia. Ginbutang sia sa pretrial detention sing halos lima ka bulan sang 2019 antes sia ginsentensiahan nga guilty kag ginpriso sang Agosto 25, 2022.

Antes sia ginpriso, si Aleksandr nagsiling kon ano ang nakabulig sa iya nga mangin positibo sang gina-hearing sia. Sia nagsiling: “Ginapamensar ko nga indi ini parte sa pagdaug sa korte, kundi parte sa pagpabilin nga matutom sa Dios. Ang desisyon sang korte indi ang pinakaimportante, kundi nagapokus ako sa pagpanaksi sa madamo nga tawo asta sa masarangan ko. Kon amo sina ang ginapamensar ko, mas mahapos atubangon ini nga sitwasyon nga may kalipay.”

Nagsiling man si Aleksandr nga nakapaumpaw gid sa iya ang Salmo 91 sang ginbutang sia sa detention center. Sa bersikulo 15, ginpasalig ni Jehova ang iya matutom nga mga alagad: “Manawag sia sa akon, kag sabton ko sia. Indi ko sia pagbayaan sa tion sang iya kalisdanan. Luwason ko sia kag padunggan.”

Indi si Aleksandr ang una nga miembro sang iya pamilya nga nagbatas sang paghingabot bangod sa relihion. Sang 1951, ang ginikanan sang iya lolo kag lola nalakip sa halos 10,000 ka Saksi ni Jehova nga gintapok sa Siberia. Ang iya nanay kag tatay pareho nga natawo didto.

Nagapasalamat kita sa halimbawa ni Aleksandr, sang iya pamilya, kag sang tanan nga nagpabilin nga matutom bangod ginpili nila si Jehova bilang ila manuggahom.—1 Tesalonica 1:2, 3.