Sang Marso 1, 2024, ginpagua sa prisuhan si Brother Oleg Danilov pagkatapos sia mapriso sing tatlo ka tuig.

Antes sia ginsentensiahan sang korte, ginsugid ni Oleg kon ano ang iya determinasyon kon mapriso sia: “Ginpamalandungan ko ang ginsiling ni Pablo sa Filipos 4:4: ‘Magkasadya kamo pirme sa Ginuo. Suliton ko, Magkasadya kamo!’ Ginsulat ini ni Pablo sang ara sia sa prisuhan. Mabakod gid ang iya relasyon kag pagsalig kay Jehova nga bisan ara sia sa prisuhan malipayon sia gihapon. Gusto ko man ini himuon kag indi ko gid pagtugutan ang bisan ano nga makadula sang akon kalipay.”

Natestingan gid ang determinasyon ni Oleg sang napriso sia kag napahilayo sa iya pamilya. Masubo gid kay wala sia naka-attend sa kasal sang iya kamagulangan nga bata nga lalaki. Ginsugid sang asawa ni Oleg nga si Sister Nataliya Danilova kon ano nakabulig sa iya: “Narealisar ni Oleg nga kon padayon niya nga pensaron kon ano ang nadula sa iya, mapaluya sini ang iya determinasyon kag indi na sia mangin malipayon. Gani, padayon niya nga gindumdom kon ano ang ara sa iya: ang iya relasyon kay Jehova, ang bulig sang balaan nga espiritu, ang pamilya nga nagapalangga sa iya, suod nga mga abyan, kag ang mga kauturan sa bilog nga kalibutan. Bangod amo sini ang ginhimo niya, pamatyag niya manggaranon gid sia.”

Ginsugid man ni Nataliya kon paano ang halimbawa ni Oleg nakabulig sa ila mga bata nga lalaki: “Sang nakita nila kon ano ang naeksperiensiahan sang ila tatay kag kon paano ginsuportahan ni Jehova ang amon pamilya, nagbulig ini sa ila nga magbakod pa gid ang ila pagsalig kay Jehova kag ang ila gugma para sa mga kauturan. Mas determinado pa gid sila subong nga unahon sa ila kabuhi ang pagsimba nila kay Jehova.”

Nagakalipay kita upod kay Oleg kag sa iya pamilya bangod updanay na sila liwat. Ang halimbawa ni Oleg nagpadumdom sa aton nga bisan pa nagaantos kita bangod sa aton pagtuo, makapabilin kita nga malipayon kag may pagsalig nga ang espiritu ni Jehova magabulig sa aton.—1 Pedro 4:14.