Sang Hunyo 11, 2024, si Sister Olga Ivanova ginpagua sa prisuhan sa Russia sa siudad sang Zelenokumsk. Ginsentensiahan sia sang tatlo ka tuig kag anom ka bulan nga pagkapriso sang Oktubre 25, 2021. Bangod gin-house arrest sia sing sobra isa ka tuig kag apat ka bulan antes sia ginpriso, nakompleto na niya ang iya sentensia. Sa pareho nga hearing, nagdesisyon ang korte nga guilty ang iya bana nga si Yevgeniy, kag ginsentensiahan sia sang walo ka tuig nga pagkapriso.

Sang ara si Olga sa prisuhan, ginpaobra sia sing mabudlay nga trabaho. Kinahanglan niya mag-obra sing 12 ka oras kada adlaw, sa sulod sang 6 ka adlaw sa isa ka semana. Kapila man sia ginsaylosaylo sa sarisari nga prisuhan sa Russia. Gani, nabudlayan gid ang balo nga nanay ni Olga nga si Svetlana nga bisitahan sia kag suportahan. Si Svetlana nagsiling parte sa kon paano nila nabatyagan ang bulig ni Jehova: “Sa kada tion nga isaylo si Olga sa lain nga siudad, ang mga kauturan didto mapinalanggaon gid nga nagahatag sang iya mga kinahanglanon. Nagalinya sila sing inoras para mahatag ang iya pagkaon kag iban pa nga mga butang nga kinahanglan niya, kag ginabisitahan nila sia kon posible. Dugang pa, sang puede ko na sia makadtuan, pirme gid may nagapadayon sa akon kag nagahatag sang bisan ano nga bulig nga kinahanglan ko. Kanami gid sini!”

Nagapasalamat gid kita kay Jehova sa iya pagpalangga kag pag-atipan kay Olga sang ara sia sa prisuhan. Samtang ginakalipay naton ang iya paggua sa prisuhan, padayon man naton nga ipangamuyo ang iya bana kag ang tanan nga ara sa prisuhan. Nagasalig kita nga padayon sila nga pakitaan ni Jehova sang iya mainunungon nga gugma.—Genesis 39:21.