NOBIEMBRE 4, 2022
RUSSIA

Ginpalig-on sang mga Halimbawa sa Biblia sang mga Tawo nga Mabakod ang Pagtuo

I-PLAY

Sa indi madugay, ipahibalo sang Petropavlovsk-Kamchatskiy City Court of the Kamchatka Territory ang desisyon sini sa kaso ni Brother Dmitriy Semenov kag sang iya asawa nga si Nadezhda. Gusto sang piskal nga prisuhon si Dmitriy kag si Nadezhda sing apat ka tuig.

Time Line

Septiembre 3, 2021

Ang babayi nga naistorya ni Dmitriy kag ni Nadezhda parte sa Biblia nanugid sa mga FSB agent. Base sa ginhatag niya nga impormasyon, ginsugdan ang kaso. Ginkasuhan sila nga nagapangumbinsi sa iban nga mag-entra sa isa ka extremist nga organisasyon kag magpakigbahin sa mga hilikuton sini
Septiembre 6, 2021

Gin-raid ang ila apartment. Gindala sila para interogahon kag ginbutangan sing restriksion ang ila pagbiyahe
Hulyo 26, 2022

Ginsugdan ang hearing

Impormasyon Parte sa Ila

Dmitriy Semenov

Natawo: 1984 (Petropavlovsk-Kamchatskiy)

Biograpiya: Nagtuon sia sang mathematics kag computer science. Nagaobra sia bilang computer programmer

Nakilala niya ang mga Saksi ni Jehova paagi sa iya paryente. Nabawtismuhan sia sang 2006. Ginpili niya ang alternative civilian service imbes nga magsoldado

Napangasawa niya si Nadezhda sang 2010

Ang Iya Ginsiling

Kay sin-o halimbawa sa Biblia ang nagpabakod sang imo pagsalig kay Jehova?

Antes pa nagsugod ang paghingabot, ginpamalandungan ko na ang halimbawa ni Jeremias, ilabi na sang ginpriso sia sang tion nga ginlikupan sang Babilonia ang Jerusalem. Daw wala na gid sang paglaum si Jeremias, pero ginproteksionan sia ni Jehova sa dalayawon nga paagi. Bisan pa wala na sang pagkaon ang mga pumuluyo sang Jerusalem, may nagahatag sang pagkaon kay Jeremias kag naluwas sia sang ginlaglag ang siudad. (Jeremias 37:21) Lain gid ang pagtan-aw ni Jehova sa aton sitwasyon, kag nahibaluan niya kon ano ang matabo. Bisan pa nga daw wala na sing paglaum, may ginahatag si Jehova nga solusyon sa eksakto gid nga tion.

Nadezhda Semenova

Natawo: 1985 (Yekaterinburg, Sverdlovsk Region)

Biograpiya: Sang bata pa sia mahilig sia magsaot kag nanamian sia magkanta sa choir sang ila eskwelahan. Nagaobra sia bilang stock clerk sa isa ka balaligyaan

Natun-an niya ang kamatuoran paagi sa iya magulang nga babayi nga nagtuon sang Biblia. Sila ni Nanay niya kag ang iya magulang nangin mga Saksi ni Jehova. Nabawtismuhan sia sang 1997

Napamana niya si Dmitriy sang 2010

Ang Iya Ginsiling

Ano nga kasaysayan sa Biblia ang nagpabakod sang imo pagtuo?

Bag-o lang namon ginbinagbinag ang balo nga babayi sa Sarepta kag kon paano niya ginpakita ang iya pagtuo antes niya nabaton ang pagpakamaayo. Ang artikulo nga amon ginbinagbinag nagsiling: “Ginapakamaayo sang Dios ang mga tawo nga may pagtuo.” Ang 1898 nga gua sang Zion’s Watch Tower, nagsiling pa gid: “Gani nagadepende ini sa aton, kay sa aton mga tikang sa dalagan sang kabuhi ginadala kita sang Ginuo sa duog diin ginatilawan niya ang aton pagtuo. Kon magtuo kita matigayon naton ang pagpakamaayo; kon indi, mawasi naton ini.”

Natun-an ko sa sini nga bisan daw ano man kabudlay ang mga pagtilaw, importante gid nga himuon ko ang akon bahin paagi sa pagpabilin nga matutom kay Jehova kag sa akon mga kauturan. Kon himuon ko ini, buligan ako ni Jehova nga makabatas paagi sa paghatag sa akon sang kaisog, pagtuo, kag sang kusog nga kinahanglan ko.

Pareho sa naeksperiensiahan gid ni Dmitriy kag ni Nadezhda, ginabuligan ni Jehova ang iya mga alagad nga mangin maisog kag mabakod kon ginahingabot sila. Wala gid niya sila ginabiyaan.—Josue 1:9.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE