Sang Pebrero 18, 2020, ginpamatbatan nga guilty si Yevgeniy sang Zheleznodorozhniy District Court sa Khabarovsk, Russia, kag ginsilutan sing duha ka tuig nga suspended prison sentence. Kon magsaylo sang ilistaran si Yevgeniy ukon makahimo sang bisan ano nga krimen sa sulod sinang duha ka tuig, prisuhon sia dayon. Ginbutang sia sa probation sa una nga anom ka bulan sang iya sentensia, kag dapat sia magreport sa presinto kada bulan. Dugang pa, sa tion sang iya probation, indi sia puede magkadto sa iban nga lugar sa gua sang siudad sang Khabarovsk kag indi sia puede makagua sa iya balay kon gab-i. Iapelar ni Yevgeniy ang desisyon sang korte.