Sa Pebrero 1, 2021, a mahimo ipahibalo sang Abakan City Court of the Republic of Khakassia ang desisyon sini sa kaso ni Brother Roman Baranovskiy kag sang iya iloy nga si Sister Valentina Baranovskaya. Wala pa sing may ginsiling ang piskal kon ano nga sentensia ang gusto niya para sa ila.

Roman Baranovskiy

• Natawo: 1974 (Balakovo, Saratov Region)

• Biograpiya: Nagapangkay-o sia sing balay para masuportahan niya ang kinahanglan nila sang iya iloy. Nanamian sia maggitara, mag-chess, kag mag-soccer

  Sang pamatan-on sia, ginpamensar niya kon ngaa gintuga kita sang Dios. Nagsiling sia: “Ginapamangkot ko sadto ang Dios kon ano ang himuon ko sa akon kabuhi.” Sang 1993, nagtuon sia sang Biblia upod sa mga Saksi ni Jehova. Nabawtismuhan sia sang 1997

Valentina Baranovskaya

• Natawo: 1951 (Vannovka, Kazakhstan)

• Biograpiya: Nagtrabaho sia bilang accountant kag financial planner asta sang nagretiro sia sang 2006. Nanamian sia magluto, magsulat sang kanta, kag maghimo sang binalaybay

  Sang 1995, sia kag ang iya bata nga lalaki nagtuon sang Biblia upod sa mga Saksi ni Jehova. Nalipay gid sia sang nabal-an niya nga imposible sa Dios nga magbutig. Nabawtismuhan sia sang 1996

Sang gab-i sang Abril 10, 2019, gin-raid sang armado nga mga pulis ang apat ka balay sa Abakan, lakip ang balay ni Brother Roman Baranovskiy kag sang iya iloy nga si Valentina. Ginkompiskar sang mga pulis ang ila mga Biblia, mga gadyet, kag ang ila personal nga mga papeles. Ginpasakaan sila sing kaso kriminal.

“Sang gin-raid kami,” siling ni Roman, “midweek miting namon kag bag-o lang ginbinagbinag ang 1 Corinto 10:13. Natun-an namon sa sini nga teksto ang isa ka importante nga kamatuoran. Wala ginapili ni Jehova kon ano nga pagtilaw ang maagyan naton. Wala si Jehova nagasiling: ‘Kay bakod ka, amo ’ni imo pagtilaw kay masarangan mo ’ni. Ikaw naman ya kay maluya ka, medyo hapos lang nga pagtilaw ang ihatag ko sa imo.’ Kon amo sini ang nagakatabo, sigurado nga magsalig kita sa aton kaugalingon nga kusog. Pero dapat naton dumdumon nga mahimo naton maagyan ang sarisari nga pagtilaw. Kon magsalig kita sa kusog ni Jehova, makabatas kita tanan.”

Sang Hulyo 2020, na-stroke si Valentina. Nagsiling sia: “Samtang nagalala ang akon kondisyon, mas nabatyagan ko nga ginabuligan ako ni Jehova. Pirme ako nagapangamuyo sa iya, gani pamatyag ko ginahakos niya ako. Nabatyagan ko gid ang matuod nga kalinong.”

Bangod sa iya mga inagihan, nakasiling si Valentina: “Bisan ano man ang matabo sa akon, determinado ako nga alagaron ang akon Amay sing wala katapusan kag mangin matutom sa iya.”

Pirme ginapamalandungan ni Roman ang halimbawa sang matutom nga mga alagad ni Jehova sa Biblia kag sa aton panahon subong. Nagsiling sia nga napabakod gid sini ang iya pagtuo. Kon ginapamalandungan niya ang ila mga halimbawa, pirme niya ginapamangkot ang iya kaugalingon: ‘Ano nga sitwasyon ang kinahanglan nila batason kag ngaa? Ano ang nakabulig sa ila nga mangin matutom? Paano sila ginbuligan ni Jehova paagi sa iya balaan nga espiritu?’ Ang mga sabat sa sini nga mga pamangkot, nagpasalig gid kay Roman nga bisan ano man nga pagtilaw ang iya maeksperiensiahan, “Si Jehova magahatag sing gahom nga labaw sa kinaandan kon kinahanglanon.”

Ginapangamuyo naton nga si Roman, si Valentina, kag ang tanan naton nga pinalangga nga mga kauturan sa Russia padayon nga magsalig kay Jehova bilang ila dalangpan kag kusog.—Salmo 46:1.