Sang Nobiembre 24, 2020, ginpamatbatan nga guilty sang Petropavlovsk-Kamchatskiy City Court sang Kamchatka Territory si Brother Sergey Ledenyov. Ginhatagan sia sing duha ka tuig nga suspended prison sentence kag tatlo ka tuig nga under probation. Indi sia pagprisuhon sa sini nga tion.

Sa katapusan nga adlaw sang bista, may kombiksion nga ginpaathag ni Sergey kon ano ang buot silingon nga mangin isa sa mga Saksi ni Jehova. Sia nagsiling: “Ang Jehova indi ngalan sang mga tawo, organisasyon, ukon relihion. Jehova ang personal nga ngalan sang Dios. Sa Biblia, sa libro ni propeta Isaias, gintawag ni Jehova ang iya matutom nga mga alagad nga ‘akon mga saksi.’ Base sa sini, sa kombension sang 1931, ginbaton ang ngalan nga ‘Mga Saksi ni Jehova.’ Nalakip sa sini nga ngalan ang asaynment nga mangin saksi sang Dios, buot silingon, isugid sa iban nga sia ang Manunuga, Manluluwas, kag Soberano sang bilog nga uniberso kag isugid man ang parte sa iya matahom nga katuyuan para sa mga tawo. Daku gid ini nga kadungganan para sa akon mga masigkatumuluo kag sa akon.”—Isaias 43:10.

May kombiksion nga ginsilingan ni Sergey ang korte: “Wala ako sing dapat ikahuya, kay wala man ako sing nahimo nga krimen. Matinlo ang akon konsiensia sa atubangan sang Dios kag sang tawo.”