Sang Hunyo 26, 2020, si Brother Dennis Christensen ilegal nga ginbutang sang mga awtoridad sang prisuhan sang Lgov sa isa ka selda nga para sa mga priso nga ginasilutan (EPKT). Diri nga selda ginabutang ang mga priso nga nakahimo sing grabe nga sala sa sulod sang prisuhan. Nagmasakit si Brother Christensen sa prisuhan kag indi pa maayo ang iya pamatyag, gani posible nga ginhimo ini sa iya sang mga awtoridad para paluyahon pa gid sia kay gusto nila nga talikdan niya ang iya pagtuo. Posible man nga naghimuhimo ang prosecutor’s office sing bag-o nga mga kaso batok kay Brother Christensen para punggan ang temprano nga pagpagua sa iya, bisan pa nga sang nagligad lang nga mga inadlaw ginsuportahan mismo sining prosecutor’s office ang desisyon sang korte nga paguaon sia sing temprano.

Natapos na ni Brother Christensen ang sobra katunga sang iya anom ka tuig nga sentensia. Sobra na isa ka tuig nga nangin kalipikado si Brother Christensen nga makapangabay nga mahatagan sing parol ukon makagua sing temprano sa prisuhan. Pagkatapos nga ginbasura sang korte ang iya tatlo ka aplikasyon, ginbaton gid man sang korte ang ikap-at. Sang Hunyo 23, 2020, ang Lgov District Court nagmando nga multahan na lang sia imbes nga tapuson ang iya sentensia. Ang mando sang korte ginsuportahan sang piskal nga si Mr. Artem Kofanov, nga amo ang nakigbahin sa sini nga pagbista.

Pagligad sang duha ka adlaw, ang isa pa gid ka piskal nga si Mr. Aleksei Shatunov nagsiling nga ilegal ang desisyon sang korte kag dapat ini kanselahon. Gusto niya nga bistahon liwat sang amo gihapon nga korte ang kaso pero iban na nga judge ang mauyat. Ginbase ini ni Mr. Shatunov sa negatibo nga mga report sang mga opisyal sang prisuhan nga “indi maayo ang rekord sa trabaho ni Brother Christensen kag indi maayo ang iya paggawi sa prisuhan.”

Sang nagbista para sa parol ni Brother Christensen sang Hunyo 23, gingamit na ina nga argumento sang mga opisyal sang prisuhan pero suno sa judge, indi insakto ina nga mga argumento. Ginpresentar sa korte sang abogado ni Brother Christensen ang iya medikal nga mga rekord nga nagapakita nga indi sia puede maghimo sang mabug-at nga mga trabaho sa prisuhan bangod sang iya ginabatyag. Kag sang ginpamangkot ang isa ka opisyal sang prisuhan, nagsiling ini nga bangod sang ginabatyag ni Brother Christensen, wala sing obra sa prisuhan nga puede para sa iya.

Samtang ginahanda sang prosecutor’s office ang pag-apelar batok sa temprano nga pagpagua sa prisuhan kay Brother Christensen, ang mga awtoridad sa prisuhan nagpagua sang duha ka report batok sa iya. Ang isa ka report nagasiling nga ara sia sa kalan-an bisan indi pa oras, kag ang ikaduha nagasiling nga naga-T-shirt lang sia kag wala naga-jacket sa barracks. Bangod sini, ginbutang si Brother Christensen sa EPKT sa sulod sang pulo ka adlaw. Suno sa kasuguan sang Russia, mahimo lamang ini sang mga awtoridad kon sulitsulit nga nakahimo ang isa ka priso sang serioso nga paglapas sa kasuguan sang prisuhan, kag pagkatapos nga maeksamin sia sang doktor. Wala nakahimo si Brother Christensen sang serioso nga paglapas sa kasuguan sang prisuhan kag wala man sia naeksamin sang doktor, gani wala sing rason nga ibutang sia sa EPKT.

Si Brother Christensen kag ang isa pa ka priso updanay sa isa ka selda nga mga tres por dos metros lang ang kadakuon. Wala gawa sing hangin nga nagasulod kag may mga mold ini, nga mahimo magpalala pa gid sa ginabatyag ni Brother Christensen. Gin-pneumonia sia sang nagligad nga mga binulan kag may malala sia nga sakit sa taludtod. Ang abogado ni Brother Christensen nagsiling nga “kabalo ang mga opisyal sang prisuhan sang iya ginabatyag pero ginbutang gihapon nila sia sa selda nga may matig-a nga hiligdaan, amo nga nagaantos sia sing grabe nga kasakit.”

Ginsilingan ni Brother Christensen ang iya abogado nga sang tion nga gin-akusar sia nga naglapas sa kasuguan sang prisuhan, may upod sia nga iban nga mga priso pero sia lang ang ginbutang sa EPKT. Ang abogado ni Brother Christensen nagsiling, “Nagapati kami nga bahin ini tanan sang plano para indi masunod ang mando sang korte nga pagguaon si Dennis.”

Padayon nga nagahimo ang mga awtoridad sa Russia sang bag-o kag mas mapintas nga mga paagi para hingabuton ang aton mga kauturan didto, pero nagasalig gid kita nga si Jehova ang ila mangin malig-on nga dalangpan. Kabay nga ipangamuyo naton tanan nga hatagan ni Jehova si Brother Christensen kag ang iya asawa nga si Irina sang tanan nila nga kinahanglanon para makapabilin nga matutom sa sining mabudlay gid nga tion.—Salmo 94:13, 21, 22.