Sang Marso 23, 2020, sa Khabarovsk Territory sa Russia, wala kaluoy nga ginransak sang mga agent sang Federal Security Services (FSB) ang balay ni Brother Igor Avramenko, anom ka adlaw pagkatapos sia napatay bangod sa heart failure. Ginpakita sang mga imbestigador kay Sister Avramenko ang search warrant nga may ngalan ni Brother Avramenko, pero ginpanguha nila ang kompyuter, kamera, kag pila ka personal nga mga gamit sang iya nabalo nga asawa nga si Yelena.

Antes sina, ginkadtuan sang mga agent si Sister Avramenko sa ulubrahan sini kag gin-updan pauli sa iya balay, diin nagahulat na ang nagapanguna sa imbestigasyon nga si Stanislav Grebenkin nga may dala nga search warrant. Ginsugiran ni Sister Avramenko si Mr. Grebenkin nga patay na ang iya bana. Bal-an man ini ni Mr. Grebenkin pero nagsiling sia nga nakahatag na sang search warrant ang mga awtoridad antes pa mapatay si Brother Avramenko gani padayunon nila ang pag-raid sa iya balay.

Ginpasalig sang imbestigador si Sister Avramenko nga mainspeksion lang sila kay kinahanglan kuno ini para “matapos dayon ang kaso kag mabutang na ini sa archive [sang FSB].” Pero ginransak nila ang iya balay.

Sa Khabarovsk Territory, pulo ka Saksi ang ginpasakaan sang kaso kriminal. Bisan pa padayon nga ginatinguhaan sang mga awtoridad nga paluyahon ang pagtuo sang aton mga kauturan sa Russia, kabalo kita nga ‘mangin mabakod sila kon magpakalinong sila kag magsalig’ sa aton mahigugmaon nga Amay nga si Jehova.—Isaias 30:15.