HUNYO 28, 2024
RUSSIA

Ginsentensiahan nga Guilty ang Tatlo ka Sister sa Republic of Kalmykia, Russia

I-PLAY

Sang Hunyo 24, 2024, nagdesisyon ang Elista City Court of the Republic of Kalmykia nga guilty sanday Sister Tsagan Khalgaeva, Sister Yekaterina Menkova, kag Sister Kishta Tutinova. Si Tsagan kag si Yekaterina ginsentensiahan sang duha ka tuig nga suspended prison. Si Kishta naman ginsentensiahan sang tatlo ka tuig nga suspended prison. Indi sila kinahanglan nga mapriso sa sini nga tion.

Impormasyon Parte sa Ila

Tsagan Khalgaeva

Natawo: 1978 (Lagan, Republic of Kalmykia)

Biograpiya: Nag-obra sia bilang sastre

Ginsudlan niya ang sarisari nga relihion para pangitaon ang sabat sa iya mga pamangkot. Nagpa-Bible study sia sa mga Saksi ni Jehova kag nakita niya ang sabat sa iya mga pamangkot sa Biblia

Nabawtismuhan sia sang 2004

Ang Iya Ginsiling

Ano ang ginapasalamatan mo gid sa sining mabudlay nga tion?

Ginapasalamatan ko gid ang pagpangamuyo sang akon mga kauturan para sa akon. Kon kaisa, kon nagaluya ang akon buot, nagahibi na lang ako samtang nagapangamuyo kay Jehova bangod indi ’ko kabalo sang akon isiling. Pero kabalo ’ko nga ginapangamuyo man ako sang iban, kag nakita ko gid kon paano ginasabat ni Jehova ang akon mga pangamuyo. Nakabulig ini sa akon nga ipangamuyo man ang iban nga nagabatas sang mga kabudlayan. Ang pagpangamuyo para sa akon kauturan, kag bangod kabalo ako nga ginapangamuyo man nila ako, nakahatag gid sa akon sang paumpaw. Ang aton pagbuligay nagapalig-on sa aton kay ginapakita sini nga nahiusa kita.

Yekaterina Menkova

Natawo: 1982 (Tavn-Gashun, Republic of Kalmykia)

Biograpiya: Nag-obra sia bilang laboratory assistant

Namana sia sang 2009. May isa sia ka bata nga lalaki

Nagdayaw gid sia sang nakita niya nga ginasunod sang mga Saksi ni Jehova ang ginasiling sang Biblia kag kon paano nagnami ang iya kabuhi sang ginsunod niya ang mga prinsipio sa Biblia. Nabawtismuhan sia sang 2017

Ang Iya Ginsiling

Ano nga teksto sa Biblia ang nagpabakod sang imo pagsalig kay Jehova?

Nakapabakod gid sa akon ang Salmo 8:3, 4, nga nagasiling: “Kon makita ko ang kalangitan, ang binuhatan sang imo mga tudlo, ang bulan kag ang kabituunan nga imo ginhimo, ano gid bala ang mamalatyon nga tawo nga ginadumdom mo sia, kag ang anak sang tawo nga ginaatipan mo sia?” Sa sini nga teksto, ginasiling sang Biblia nga gintuga ni Jehova ang daku kaayo nga uniberso kag ang tanan nga ari sa sini paagi lang sa iya mga tudlo. Kon ginapamensar ko ini, nagapasalig ini sa akon nga paagi sa bulig ni Jehova, wala gid ako sang dapat kahadlukan.

Kishta Tutinova

Natawo: 1961 (Novolesnoy, Astrakhan Region)

Biograpiya: Nag-obra sia bilang sastre. Isa sia ka single mother kag may duha sia ka bata nga lalaki

Buddhist ang iya pamilya. Ang isa niya ka kostumer nga Saksi ni Jehova amo ang nagbulig sa iya nga magtuon sa Biblia. Nalipay si Kishta nga mahibaluan kon paano simbahon ang Dios kag indi na magsunod sa mga tradisyon kag mga disparatis. Nabawtismuhan sia sang 2003

Ang Iya Ginsiling

Ano ang nakabulig sa imo nga mangin positibo?

Sang gin-house arrest ako, indi ako makagua sa sulod sang sobra apat ka bulan. Mabudlay gid ini, kay nagaistar ako sa isa ka apartment nga wala sing kuarto upod sa akon bata nga lalaki kag sa iya pamilya. Pito kami tanan sa sini nga apartment. Naapektuhan gid ang akon panglawas kay kagamay sang apartment kag indi ako makagua. Pero nakabulig sa akon ang pagpamalandong sa Hulubaton 24:10, nga nagasiling: “Kon maluya ang imo buot sa tion sang kalisdanan, magaluya man ang imo kusog.” Narealisar ko nga puede ako makapili kon ang pensaron ko positibo ukon negatibo. Nadumduman ko ang halimbawa ni Jose. Bisan mabudlay ang iya sitwasyon sa prisuhan, wala sia naakig. Ginpili ko nga pamensaron ang positibo nga mga butang sa akon kabuhi, gani wala nadula ang akon kalipay.

Nagadayaw gid kita sa pagtuo nga ginapakita sang mga kauturan naton. Kag nagapasalamat kita kay nahibaluan ni Jehova ang aton mga kabudlayan kag padyaan gid niya ang aton katutom.—Salmo 37:18.

Time Line

Pebrero 16, 2023

Ginsugdan ang kaso ni Kishta
Pebrero 28, 2023

Gin-raid ang mga balay. Gindala si Kishta sa temporary detention facility
Marso 1, 2023

Ginpahalin sa obra si Tsagan bangod madamo nga tawo ang nakabalo nga ginkasuhan sia nga isa ka kriminal. Ginpagua si Kishta sa temporary detention pero gin-house arrest sia gihapon
Hulyo 21, 2023

Natapos na ang pag-house arrest kay Kishta
Disiembre 19, 2023

Ginsugdan ang kaso ni Yekaterina kag ni Tsagan. Ginbutangan sing restriksion ang ila pagbiyahe
Pebrero 9, 2024

Ginbutangan sing restriksion ang pagbiyahe ni Kishta
Abril 1, 2024

Ginsugdan ang hearing
Hunyo 24, 2024

Nagdesisyon ang korte nga guilty sila kag ginsentensiahan sang suspended prison

Tan-awa Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE