HUNYO 27, 2023
RUSSIA

Ginsentensiahan nga Guilty si Brother Skvortsov kag si Brother Tibiy

I-PLAY

Sang Hunyo 20, 2023, ginsentensiahan sang Taganrog City Court of the Rostov Region nga guilty si Brother Aleksandr Skvortsov kag Brother Valeriy Tibiy. Si Aleksandr ginsentensiahan sang pito ka tuig nga pagkapriso. Ara na sia sa detention center halin sang Disiembre 7, 2021, kag padayon sia nga prisuhon. Ginsentensiahan si Valeriy sing anom ka tuig nga suspended prison. Ara sia sa detention center halin sang Mayo 18, 2022, kag ginpagua sia.

Impormasyon Parte sa Ila

Aleksandr Skvortsov

Natawo: 1962 (Taganrog)

Biograpiya: Nagaobra sia bilang welder

Napangasawa niya si Larisa sang 1983. May duha sila ka anak nga babayi

Nag-Bible study si Larisa sa mga Saksi ni Jehova kag nabawtismuhan sang 1996. Nalipay si Aleksandr nga matun-an ang paglaum sa Biblia parte sa kalibutan nga wala na sing inhustisya. Nabawtismuhan sia sang 1997

Ginsentensiahan na sia nga guilty sang 2015 kag lima ka tuig kag tunga sia sa suspended prison

Ang Ginsiling sang Iya Asawa nga si Larisa a

Ano ang nakabulig sa imo bana nga maatubang ang sitwasyon sa pretrial detention center?

Sa sulod sang isa ka tuig, ginsaylosaylo si Aleksandr sa 13 ka lainlain nga selda. Bisan pa indi pirme mahapos para sa iya nga magpakigbagay sa iya kaupod nga mga priso, ginatinguhaan gid niya nga mangin mainayuhon sa tanan. Pirme niya ginasiling nga ang pagpangamuyo kay Jehova, pagbasa sang iya Biblia, kag pagbasa sang mga sulat nga nabaton niya amo ang nakabulig sa iya nga magpabilin nga suod kay Jehova. Pinakamabudlay gid para sa iya nga mapalayo sa iya mga pinalangga. Pero ginahatagan sia ni Jehova sing kalinong.

Paano ini nga eksperiensia nakaapekto sa imo relasyon kay Jehova?

Mas nagsalig pa gid ako kay Jehova subong. Nakita ko ang pagbulig Niya sa amon sang akon bana gani nakumbinsi ako nga palangga gid Niya kami. Nakahibi gid ako sang nabatyagan ko ang pag-atipan sang mga kauturan kag sang nabal-an ko nga ginapangamuyo nila kami.

Valeriy Tibiy

Natawo: 1977 (Novopokrovka, Crimea)

Biograpiya: Nagaobra sia bilang drayber sang trak

Nag-Bible study sia upod sa mga Saksi ni Jehova sa tapos mabal-an ang ngalan sang Dios. Nabawtismuhan sia sang 2004

Napangasawa niya si Kristina sang 2012

Ang Ginsiling sang Iya Asawa nga si Kristina b

Paano gin-atubang ni Valeriy ang wala kasiguruhan nga kabuhi sa detention center?

Nagapangamuyo pirme si Valeriy para mangin kalmado kag mabakod sia kag mabatas ang magahod kag gutok nga selda. Natalupangdan gid ini sang iya kaupod nga mga priso. Pirme nila sia ginapamangkot: “Ngaa kalmado ka lang? Ikaw ang pinakakontento kag pinakamalipayon nga tawo diri!” Nalipay si Valeriy nga pirme sia makapakig-istorya sini nga mga tawo, bangod ginabuligan sia ni Jehova nga sundon ang mga prinsipio sa Biblia. Nagapangayo pa gani ang iya kaupod nga mga priso sing laygay sa iya. Nabatyagan gid niya ang proteksion ni Jehova bangod ginarespeto nila sia.

Ano nga teksto sa Biblia ang nangin espesyal gid para sa imo sa sining mabudlay nga tion?

Sa sini nga paghingabot, ang Hulubaton 3:6 nakabulig sa akon nga magsalig pa gid kay Jehova. Nagasiling ini: “Hunahunaa sia sa tanan mo nga dalanon, kag tadlungon niya ang imo mga banas.” Si Jehova lang gid ang pinakamaalam. Kon may ara ako sing problema, natun-an ko nga importante nga hibaluon sa Biblia kon ano ang masiling ni Jehova sa sini. Sa bisan ano man nga sitwasyon, pirme gid ako ginaatipan ni Jehova.

Ginapasalamatan gid naton si Jehova kay bangod sa iya pagpalangga kag paggiya, nangin posible gid para sa aton nga mabatas ang ano man nga pagtilaw nga maatubang naton.—Salmo 5:12.

Time Line

Marso 20, 2021

Gin-raid ang balay sang mga Skvortsov
Disiembre 7, 2021

Gin-raid liwat ang balay sang mga Skvortsov lakip ang 29 ka balay sang iban pa nga mga Saksi ni Jehova sa Taganrog. Gin-akusar sia kag ginbutang sa temporary detention center
Disiembre 8, 2021

Ginbutang si Aleksandr sa pretrial detention center
Marso 29, 2022

Ginkasuhan si Valeriy
Marso 31, 2022

Gintingob sang mga imbestigador ang mga kaso nanday Aleksandr kag Valeriy
Mayo 18, 2022

Gin-aresto si Valeriy kag ginbutang sa temporary detention center
Mayo 26, 2022

Ginbutang si Valeriy sa pretrial detention center
Disiembre 6, 2022

Ginsugdan ang hearing
Hunyo 20, 2023

Ginsentensiahan si Aleksandr sing pito ka tuig nga pagkapriso. Ginsentensiahan si Valeriy sing anom ka tuig nga suspended prison

a b Samtang ginahanda ini nga artikulo, si Brother Skvortsov kag Brother Tibiy ara sa pretrial detention center kag wala sila mainterbyu.

Tan-awa Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE