Sang Biernes sang aga, Disiembre 13, 2019, ginpamatbatan sang Leninsky District Court sang Penza si Vladimir Alushkin kag ginsentensiahan sia nga mapriso sing anom ka tuig. Gilayon nga ginpusasan sia kag ginpriso. Upod sa pareho nga kaso ang lima pa, lakip ang asawa ni Vladimir nga si Tatyana. Ang korte nagdesisyon nga ibutang sa probation ang lima ka utod (tatlo ka brother kag duha ka sister). Kon indi nila pagtumanon ang ila probation, prisuhon sila sing duha ka tuig. Iapelar sang anom naton ka kauturan sa Penza ang desisyon sang korte.

Suno sa ginreport sang nagligad, si Vladimir Alushkin gin-aresto sang Hulyo 15, 2018, sa tapos nga ginsulod ang iya balay sang sobra napulo ka armado nga pulis nga may tabon sa guya. Ginhalughog sang mga pulis ang iya balay sing halos apat ka oras. Ginpanguha nila ang mga cell phone, mga gadyet, mga Biblia, kag iban pa nga literatura. Sina man nga adlaw, ginhalughog sang mga pulis ang lima pa ka balay sang mga Saksi ni Jehova kag gindala ang mga 40 ka kauturan sa presinto para kuestyunon.

Si Brother Alushkin ginbutang sang mga pulis sa temporaryo nga prisuhan sa sulod sang duha ka adlaw, antes nagmando ang Pervomayskiy District Court sang Penza nga prisuhon sia sing duha ka bulan bisan wala pa sia mabista. Pagkatapos sini, duha ka beses pa nga ginpalawig sang korte ang pag-aresto kay Brother Alushkin. Mga anom ka bulan sia nga ginpriso bisan wala sia mabista, kag pagkatapos sini gin-house arrest sia asta ginpamatbatan sang Disiembre 13.

Tatlo sa lima pa ka mga Saksi ang ginpasakaan sing kaso kriminal nga nalakip sa kaso ni Brother Alushkin. Sila sanday Brother Vladimir Kulyasov, Andrey Magliv, kag Denis Timoshin. Gin-house arrest sila samtang ginaimbestigahan kag ginabista ang kaso. Ang duha pa, nga sanday Sister Tatyana Alushkina kag Galiya Olkhova, gindumilian nga magpakig-istorya sa iban kag magbiyahe halin pa sang Pebrero 2019.

Sang Agosto 2019, ang United Nations (UN) Working Group on Arbitrary Detention (WGAD) nagbalhag sang 12 ka pahina nga opinyon nga nagapakamalaut sa Russia bangod sa pag-aresto kag pagpriso kay Brother Alushkin. Suno sa WGAD, si Brother Alushkin “dapat wala gin-aresto kag wala sia ginpriso nga wala mabista, kag dapat indi pagbistahon si Mr. Alushkin.” Gin-insister sang WGAD nga “ang nagakaigo nga solusyon amo nga buy-an gilayon si Mr. Alushkin.” Para depensahan ang anom ka kauturan sa Penza, ginbase sang mga abogado ang ila mga argumento sa opinyon sang WGAD nga ginarespeto sa bilog nga kalibutan. Pero sang ginbasa ang desisyon sang korte sang Disiembre 13, ang judge nagsiling nga nagapati ang korte nga ang desisyon sang Supreme Court sang 2017—sang gin-ban sini ang pagsimba sang mga Saksi ni Jehova—mas importante sangsa opinyon sang WGAD.

Sini nga tuig, 18 na ka kauturan ang ginsentensiahan sang Russia nga guilty, kag siam na ka brother ang ginpriso sing sarisari nga kalawigon. Sobra 40 na ka kauturan ang ginpriso bisan wala pa mabista kag 19 ang naka-house arrest. Sa bilog nga Russia, halos 300 na ka kauturan ang ginpasakaan sing kaso kriminal bangod sang ila pagtuo.

Bisan nasubuan kita nga mabalitaan ang paghingabot sa aton mga kauturan, indi na bag-o sa aton ini nga mga pagtilaw. Gintagna na ini, amo man ang promisa sang mahigugmaon nga bulig ni Jehova. Ginapangamuyo naton nga ang ‘espiritu sang himaya, ang espiritu mismo sang Dios, mangin yara sa ila.’—1 Pedro 4:12-14.