Sang Enero 20, 2021, ginsentensiahan nga guilty sang Birobidzhan District Court of the Jewish Autonomous Region si Brother Yevgeniy Golik. Ginsentensiahan sia sang duha ka tuig kag tunga nga suspended prison sentence. Indi sia kinahanglan nga prisuhon sa sini nga tion. Magaapelar sia sa sentensia sa iya.

Yevgeniy Golik

• Natawo: 1975 (Birobidzhan, Jewish Autonomous Region)

• Biograpiya: Isa sia ka eksperto nga welder. Nagatrabaho sia bilang isa ka boiler-room operator. Nangin soldado man sia sang Russia antes sia nangin Saksi ni Jehova

  Natun-an niya ang kamatuoran sa iya iloy. Nasabat ang iya pamangkot kon ngaa gintuga kita sang Dios. Nagaulikid gid sia sa iban nga tawo bangod sang iya natun-an sa Biblia

Sang aga sang Mayo 17, 2019, gin-raid sang 150 ka Federal Security Service (FSB) ang siam ka balay sang mga Saksi ni Jehova sa siudad sang Birobidzhan sa sidlangan sang Russia. Ini nga operasyon sang FSB gintawag nila nga “Adlaw sang Paghukom.” Ginpasakaan sang kaso sang mga awtoridad si Brother Yevgeniy Golik kag ang 21 pa ka mga kauturan halin sa Jewish Autonomous Region. Ang hearing sang iya kaso nagsugod sang Enero 29, 2020.

Ang mga nagsumbong may ginpagua nga mga ebidensia. Lakip sa sini ang video ni Yevgeniy nga nagatuon sing Biblia kag sang iban pa nga publikasyon nga nabase sa Biblia.

Kabudlay gid kon mangin biktima ka sang inhustisya. Pero, amo ini ang ginsiling ni Yevgeniy: “Ang regular nga pagtuon sang Biblia kag ang pagpangamuyo nakabulig sa akon nga magpokus kay Jehova kag indi sa akon kaugalingon. Ang akon nabasa sa Pulong sang Dios nagapalipay gid sa akon amo nga gusto ko man ini isugid sa iban.”

Nakabulig sa iya sang ginpamalandungan niya ang Salmo 23:4. Nagsiling sia: “[Ina nga teksto] nakabulig sa akon nga magin maisog kag mabatas ang akon sitwasyon sing malipayon. Bisan pa mabutang sa katalagman ang aton kabuhi, bal-an naton nga indi gid kita pagpabay-an ni Jehova.”

Wala man ginpabay-an si Yevgeniy sang iya mga kauturan. “Nagkadto ang mga kauturan sa korte sang nagsugod na ang pag-hearing sa akon kag napalig-on gid ako sini,” siling niya. “Sa sining mabudlay nga mga tion, ang akon asawa nga ginregalo sa akon ni Jehova, nagbulig gid sa akon. Gani, pirme ako malipayon. Madamo ako sing napamalandungan nga mga punto sa Biblia kag bastante man ang akon pagkaon. Magluwas sina, madamo pa gid ako sing nabaton nga bulig.”

Ginatinguhaan gid ni Yevgeniy nga indi magluya ang iya kaangtanan kay Jehova. May ginsiling sia para sa mga utod nga wala pa makaagi sang paghingabot pareho sa naagyan niya. Nagsiling sia: “Magsaulo sang mga [Kingdom] song, tun-i nga higugmaon ang imo mga kaaway, kag tun-i nga mangin malipayon nga alagad sang Dios sa bisan ano nga sitwasyon.”

Madamo kita sing matun-an nga importante nga mga leksion sa aton mga kauturan sa Russia. Ginapabaskog sila ni Jehova para mabatas nila ang mga pagtilaw. Gani, sigurado nga pabaskugon man kita ni Jehova.—Salmo 29:11.