Sang Enero 25, 2021, gin-deny sang Supreme Court sang Kabardino-Balkarian Republic ang pag-apelar sang piskal sa Oktubre 7, 2020, nga desisyon nga not guilty si Brother Yuriy Zalipayev. Mahimo nga iapelar liwat sang mga nagasumbong ining ulihi nga desisyon. Pero bangod not guilty ang desisyon, wala na sing kaso si Yuriy. Puede man sia makapangayo sing danyos bangod sa indi matuod nga mga panumbungon nga ginpasaka batok sa iya.

Nagsalig si Yuriy kay Jehova kag nangin maisog sia sa korte bisan pa nga kabalo sia nga mahimo magdesisyon ang Supreme Court nga guilty sia. Antes sang desisyon, maisog nga ginsiling ni Yuriy sa korte nga indi na lang madugay dulaon na sang Dios ang tanan nga kalautan, lakip ang paghingabot nga naeksperiensiahan sang mga Saksi ni Jehova sa Russia. Nagsiling sia: “Bisan pa naplano sing maayo ini nga pagpang-raid, may dapat maintiendihan ang mga manughingabot. Indi gid nila mapaluya ang akon pagtuo sa promisa sang Dios nga dulaon ang kalautan sa duta sa indi na lang madugay. Nagatuo ako sa promisa sang Dios nga sa indi na lang madugay mangin mag-ulutod na ang pagtamdanay sang tanan nga tawo bisan ano man ang ila rasa. Wala gid sing makaguba sa sini. Ang Biblia nagsiling parte sa Dios: ‘Hukman niya ang tanan nga pungsod kag tadlungon ang mga butang para sa kaayuhan sang madamo nga katawhan. Salsalon nila ang ila mga espada nga mangin mga punta sang arado kag ang ila mga bangkaw nga mangin mga garab nga inughagbas. Ang pungsod indi na makig-away sa iban nga pungsod, indi na sila magtuon sa pagpakig-away.’—Isaias 2:4.

“Kumbinsido ako nga malapit na lang ini tumanon sang Dios!”