Ang isa ka grupo sang United Nations (UN) nga ginahuman sang mga eksperto sa kasuguan halin sa sarisari nga pungsod nagsiling nga ang ginhimo sang Russia nga pag-aresto kag pagpriso kay Brother Dmitriy Mikhaylov isa ka “diskriminasyon bangod sa relihion” kag nalapas sini ang kasuguan nga ginapatuman sa bilog nga kalibutan. Ginpangabay man nila ang Russia nga iatras ang tanan nga kaso kriminal nga ginpasaka sa iya.

Suno sa 12-ka pahina nga opinyon sini nga grupo, nga Working Group on Arbitrary Detention (WGAD), ang mga ginhimo ni Brother Mikhaylov “mahidaiton gid sa tanan nga tion.” Dugang pa, “wala sing ebidensia nga sia ukon ang mga Saksi ni Jehova sa Russian Federation nangin masingki ukon nagsugyot sa iban nga mangin masingki.”

Ang WGAD nagsiling nga si Brother Mikhaylov “naghimo lamang sang iya kinamatarong sa kahilwayan sang relihion” kag “dapat wala sia gin-aresto kag ginpriso nga wala mabista.” Gani, dapat lang nga bayaran sia sang iya nawasi nga sueldo bangod indi sia makaobra kag ginkuha ang iya kahilwayan bisan wala man sia sing ginhimo nga krimen pero ginpriso sia gihapon.

Nahibaluan man sang WGAD nga indi lang si Brother Mikhaylov ang ginamaltrato bangod sa iya pagtuo. Sia “isa lamang sa mas nagadamo subong nga mga Saksi ni Jehova sa Russian Federation nga gin-aresto, ginpriso, kag ginkasuhan bilang kriminal bangod lamang sa ila pagpanghikot base sa ila kahilwayan sang relihion”—ang kinamatarong nga ginaproteksionan sang kasuguan nga ginapatuman sa bilog nga kalibutan. Gani, bilang pagkondenar sa paghingabot sa tanan naton nga masigkasumilimba sa Russia, ang WGAD maathag nga nagsiling nga ang ila opinyon wala lamang naaplikar sa ilegal nga pagpriso kay Brother Mikhaylov kundi sa tanan man nga Saksi ni Jehova nga “pareho man ang sitwasyon kay Mr. Mikhaylov.”

Si Brother Mikhaylov nagtuon sing Biblia sang tin-edyer sia kag nabawtismuhan sang 1993, sang 16 anyos sia. Sang 2003, ginpangasawa niya si Yelena, kag magkaupod sila nga nag-alagad kay Jehova.

Sang 2018, nadiskobrehan ni Brother kag Sister Mikhaylov nga ginapamatian gali sang mga awtoridad ang tanan nga tawag sa ila telepono kag gina-video sila sa sulod na sang pila ka bulan. Sang Abril 19, 2018, ang Investigation Committee of the Russian Federation sa rehiyon sang Ivanovo nagpasaka sing kaso kriminal batok kay Brother Mikhaylov kag ginhalughog sang armado nga mga pulis ang iya balay. Pagligad sang sobra isa ka bulan lang, gin-aresto sia kag ginpriso, bangod sa panumbungon nga sia ang pinanser sang isa ka hilikuton nga “batok sa gobierno.” Pagkatapos sang halos anom ka bulan—171 ka adlaw—nga pagkapriso bisan wala pa mabista, ginpagua sia. Pero, wala sia gintugutan nga magbiyahe kag ginabantayan ang tanan niya nga komunikasyon samtang wala pa matapos ang iya kaso.

Ang gobierno sang Russia ginhatagan sing anom ka bulan para sabton ang opinyon ang WGAD, diin dapat nila ipahayag kon bala gin-atras na ang kaso batok kay Mikhaylov, kon bala nabayaran na sia sing danyos, kag kon bala naimbestigahan na ang mga tawo nga naglapas sang iya kinamatarong.

Ang pareho man sini nga opinyon sang WGAD mahimo may daku gid nga impluwensia sa desisyon sang gobierno sang Kazakhstan amo nga ginpagua nila si Brother Teymur Akhmedov sa prisuhan. Sang 2017, gin-aresto sia kag ginsentensiahan sing lima ka tuig nga pagkapriso bangod mahidaiton niya nga ginasugid sa iban ang iya pagtuo. Napierde sia sa tanan nga korte sa Kazakhstan, amo nga ang iya mga abogado nag-file sang reklamo sa WGAD. Sa opinyon sang WGAD nga napetsahan sing Oktubre 2, 2017, ginkondenar sang WGAD ang mga awtoridad sang Kazakhstan kag ginpangabay sini nga paguaon si Brother Akmedov. Pagligad sang anom ka bulan, ginhatagan sang pardon sang presidente sang Kazakhstan si Brother Akhmedov. Ginpagua sia sa prisuhan sang Abril 4, 2018.

Bisan ano man ang sabat ang Russia sa desisyon sang WGAD sa kaso ni Brother Mikhaylov, bug-os gid ang aton pagsalig sa sini nga promisa: “Malipayon ang tawo nga nagadangop sa iya.” Ginapangamuyo naton nga padayon nga atipanon ni Jehova ang aton kauturan sa Russia nga ginapasakaan sang mga kaso kriminal, para labi nila nga maeksperiensiahan nga ang tanan nga may kaisog nga nagasalig sa Iya “indi pagkulangon sing maayo nga butang.”—Salmo 34:8, 10.