Si Judge Ivan Belykh sang Zheleznodorozhniy District Court sang Khabarovsk nagsiling nga ang desisyon sa kaso kriminal batok sa 52 anyos nga si Brother Valeriy Moskalenko ipahibalo sa Septiembre 2, 2019.

Si Brother Moskalenko ginpriso bisan wala pa mabista sugod sang gin-aresto sia sang aga sang Agosto 2, 2018, sang ginhalughog sang Federal Security Service (FSB) kag sang mga riot police ang iya balay. Lima ka oras nga ginhalughog sang mga agent ang balay ni Brother Moskalenko antes nila sia gin-aresto. Bangod sobra isa ka tuig na sia nga ginapriso bisan wala pa sia mabista, posible nga ang desisyon sa iya mangin pareho sa desisyon sa kaso ni Dennis Christensen.

Sang Disiembre 18, 2018, ginpasaka ang reklamo nga Moskalenko v. Russia, sa European Court of Human Rights (ECHR). Sobra na 50 ka aplikasyon batok sa Russia ang ginpasaka sa ECHR, kag 34 sa sini ang ginpalab-ot na sa gobierno sang Russia.

Ginapabugal gid naton ang aton pinalangga nga kauturan sa Russia ‘bangod sang ila pagbatas kag pagtuo bisan pa sang mga paghingabot kag mga kabudlayan nga ila ginaantos.’ Maathag gid nga ginasuportahan kag ginapakamaayo sila ni Jehova. Ginapangamuyo naton nga padayon niya nga hatagan si Brother Moskalenko sang kusog nga iya kinahanglan para makabatas nga may kalipay, bisan ano man ang mangin desisyon sang korte sa masunod nga semana.—2 Tesalonica 1:4.