ABRIL 1, 2019
RUSSIA

Isa Pa Gid ka Saksi ni Jehova sa Russia ang Ginsentensiahan nga Nakasala

I-PLAY

Sang Abril 1, 2019, ang korte sa Russia nga nagsentensia kay Brother Dennis Christensen nga mapriso sing anom ka tuig, nagsentensia man sa 56 anyos nga si Sergey Skrynnikov bangod sa paghimo sini sang mga hilikuton bilang isa sa mga Saksi ni Jehova. Ginpabayad sia sang korte sang multa nga $5,348.00 (RUB 350,000; EUR 4,758.95). Wala sia ginpriso pero gusto sang nag-akusar sa iya nga prisuhon sia sing tatlo ka tuig.

Si Brother Skrynnikov kag ang iya asawa nga si Nina, may isa ka bata nga babayi. Ginabuligan nila ang ila bata kag ang ila umagad sa pag-atipan sa ila lima ka apo. Dugang pa, sila man nga mag-asawa ang nagaatipan sa tigulang nga mga ginikanan ni Nina.

Sa korte, matinahuron kag makapakumbinsi ang pagpangapin ni Brother Skrynnikov sa iya pagtuo. Sia nagsiling: “Kon ang isa nga wala sing pagtuo sa Dios ibutang sa akon lugar, mahimo masubuan sia. . . . Pero bilang isa sa mga Saksi ni Jehova, positibo ako bangod may pagtuo ako. Kon pasugtan sang Dios nga masentensiahan ako nga nakasala, buot silingon dapat ko tamdon ining tatlo ka tuig indi bilang silot kundi bilang espesyal nga asaynment nga mag-alagad sa bag-o nga lugar! Gani wala ako nasubuan. . . . Ang Dios isa lang kag mabuligan niya kita bisan hilway man kita ukon ara sa prisuhan. Gani wala kita ginapabay-an. Kaupod naton sia bisan diin basta magpabilin kita nga matutom sa iya.”

Napalig-on kita sang mabakod nga pagtuo sang aton masigkatumuluo, pareho kay Brother Skrynnikov. Kon pensaron naton ang mapintas nga pagtilaw nga ila ginaatubang, ginapangamuyo man naton ang ginpangamuyo ni apostol Pablo: “Kabay pa nga ang Dios nga nagahatag sing paglaum maghatag sa inyo sing kalipay kag paghidait bangod sang inyo pagtuo sa iya, agod mapabakod pa ang inyo paglaum paagi sa gahom sang balaan nga espiritu.”—Roma 15:13.

Ang Katapusan nga Komento ni Brother Skrynnikov

Gin-translate halin sa Russian nga lenguahe

Una, gusto ko gid pasalamatan ang nagadumala nga hukom nga si Gleb Borisovich Noskov kay wala sia nagmando nga prisuhon ako [nga wala pa mabista], amo nga nakaupod ko ang akon pamilya asta subong. Gusto ko man pasalamatan ang tanan nga clerk sa ila mga hilikuton.

Ginapabutyag ko man ang akon pinasahi nga pagpasalamat sa piskal, kay Madam Nadezhda Gennadiyevna Naumova, bangod wala ako ginpabudlayan ukon ginmaltrato sa tion sang interogasyon.

Gusto ko man pasalamatan ang akon mga abogado, nga si Madam Irina Aleksandrovna Krasnikova kag si Mr. Anton Nikolayevich Bogdanov, sa ila pagpangabudlay para pangapinan ako. Ang matuod, nakibot gid ako nga nakadala sila sang isa ka eksperto halin sa Chelyabinsk.

Salamat sa inyo akon pinalangga nga mga abyan, sa pagkadto sa tanan nga sesyon sa korte para palig-unon ako, bisan pa kabalo kamo nga indi kamo pagsugtan nga magtambong sa sesyon.

Salamat sa akon iloy, nga nagakadto gid sa korte para palig-unon ako, bisan pa indi na maayo ang iya panglawas.

Salamat sa akon pinalangga nga asawa, nga sa sulod sang 37 ka tuig nagsuporta sa akon sa maayo kag sa mabudlay nga mga tion.

Siempre, ang akon pinakadaku nga pagpasalamat ginahatag ko sa akon pinalangga nga Dios, si Jehova, nga nagpuno sang akon tagipusuon sing paghidait kag kalipay. Mahimo daw indi kamo magpati, pero wala gid ako nagabatyag sing kasubo ukon kaakig sa natabo sa akon, kundi kalipay kag paghidait.

Ang 2 Corinto 4:8, 9 isa ka tagna sa Biblia nga nagakatuman sa natabo sa akon: “Ginaipit kami sa tanan nga paagi, apang indi buot silingon nga indi na gid kami makahulag; ginaligban kami, apang indi buot silingon nga wala na gid kami sing malutsan; ginahingabot kami, apang wala kami ginpabay-an; ginapukan kami, apang wala kami malaglag.”

Ginasugid sini sa aton nga ang mga alagad sang Dios makaeksperiensia indi lamang sing pag-ipit kag paghingabot, kundi nga ang hilikuton nga gintugyan sa ila ni Ginuong Jesus indi lamang magapadayon kundi magauswag man kag magasangkad. Ini nga mga tinaga dapat tumanon sang tanan nga nagakabig sang ila kaugalingon nga sumulunod sang Cristo:

Ang Mateo 28:19, 20 nagasugo sa aton nga “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila sa ngalan sang Amay kag sang Anak kag sang balaan nga espiritu. Tudlui ninyo sila nga tumanon ang tanan nga ginsugo ko sa inyo. Kag dumduma ninyo nga kaupod ninyo ako sa tanan nga tion tubtob sa hingapusan sang sistema sang mga butang.”

Ang espiritu ni Jehova padayon nga nagagiya sa mga Cristiano, nga nagahatag sa ila sang gahom nga labaw sa kinaandan kag nagabulig sa ila nga mahimo ang asaynment nga ginhatag sang Dios sa ila bisan pa sa mga kabudlayan nga ila ginaatubang. Labi pa gid kita nga mangin kumbinsido sa sini kon balikan naton ang nagligad. Sang dekada ’30, daw imposible gid mahimo sang mga alagad sang Dios ang ila asaynment, ang pagbantala sang mensahe sang Ginharian sang Dios sa bilog nga Soviet Union. Pero bangod ang Cristo ang nagadumala sang pagbantala nga hilikuton, sang una nga mga bahin sang dekada ’50 ang gobierno mismo sang Soviet ang naggasto para mapadala ang linibo ka pamilya sang mga Saksi ni Jehova sa Siberia asta sa pinakamalayo nga bahin sang pungsod. [Sobra] 60 ka tuig na ang nagligad kag ano na ang natabo? Ang mga opisyales sa bilog nga Siberia daw indi makapati sang narealisar nila nga naglapnag diri ang pagbantala. Ang isa ka eksperto nga pamilyar gid sa kasaysayan sang mga Saksi ni Jehova sa USSR nagsiling: “Ang pagpakig-away batok sa mga Saksi ni Jehova daw paghuyop sa mga dandelion. Kon mas baskog ang paghuyop, mas madamo nga binhi ang magalupad, kag mas malayo ang mapaliran sini.”

Subong, ining inagihan sang mga Saksi ni Jehova nasulit naman. Sin-o ang aton maistorya kon magpamalaybalay kita? Mga asawa kag mga tawo nga nagretiro na. Indi naton maabtan sa ila balay ang mga tawo nga nagaobra. Kon kaisa, mabudlay man bantalaan ang mga ara sa mataas nga mga bilding, prisuhan, kag mga korte. Pero ang pagbantala ginapangunahan sang Cristo kag ginbutang niya [ni Jehova] sa hunahuna kag tagipusuon sang Ministry of Justice nga himuon ang Iya kabubut-on. Bilang resulta, ang Ministry of Justice, ang Investigative Committee of the Russian Federation, ang mga opisina sang piskal, kag ang iban pa nga ahensia sa pagpatuman sang kasuguan, nakabulig sa mga Saksi ni Jehova sa pagbantala. Paano? Bangod sa ila ginhimo, halin sa Kaliningrad asta sa Sakhalin, kag sa Kuril Islands; halin sa Arkhangel’sk asta sa Crimea, kag Yalta; sa mga pamilya, ulubrahan, prisuhan, kag mga korte, napakilala ang ngalan sang Soberano sang Uniberso nga si Jehova nga Dios. Bilang mga Saksi ni Jehova, wala gid naton mahunahuna nga mabantalaan naton ang amo sini kadamo nga mga tawo sa madamo nga lugar. Gani may kahigayunan kita nga magbantala sa bag-o nga mga lugar kag sa lain naman nga pamaagi. Kadungganan gid naton nga mga Saksi ni Jehova nga mabantala ang maayong balita sa bag-o nga mga lugar. Kag nangin posible ini paagi sa bulig sang opisina sang piskal.

Imadyinon naton ang matabo sa palaabuton. Kon sa sulod sang napulo ka tuig ukon sobra pa padayon nga prisuhon ang mga Saksi ni Jehova, may mga 200 sa ila sa kada prisuhan. Imadyina nga may apat ka kongregasyon sang mga Saksi ni Jehova sa isa ka prisuhan! Ang mga administrador sang prisuhan magapakitluoy gid sa Ministry of Justice nga buy-an ang mga Saksi ni Jehova. Sa banta ’nyo ano naman ang ipangamuyo sang kalabanan nga Saksi? “Ginuo, patig-aha ang tagipusuon sang administrador para indi niya ako pagbuy-an. Madamo ako sang Bible study kag interesado nga mga tawo nga ginatudluan diri.”

Kon ang isa nga wala sing pagtuo sa Dios ibutang sa akon lugar, mahimo masubuan sia. Mahimo sia magsiling: “Wala ako sing ginpatay, wala ako sing gin-hold-ap, wala sing ginkawatan. Wala gani ako nagapakigbais sa iban. Napamatud-an ini sa madamo nga report. Pero gusto sang nag-akusar sa akon nga prisuhon ako sang tatlo ka tuig.” Daw masubuan ka gid; pero bilang isa sa mga Saksi ni Jehova, positibo ako bangod may pagtuo ako. Kon pasugtan sang Dios nga masentensiahan ako nga nakasala, buot silingon dapat ko tamdon ining tatlo ka tuig indi bilang silot kundi bilang espesyal nga asaynment nga mag-alagad sa bag-o nga lugar! Gani wala ako nasubuan. Kundi, ginatamod ko ini nga daku nga pribilehiyo, ang pribilehiyo nga maalagad ang Dios sa lugar nga wala pa sing Saksi ni Jehova. Madamo na sing nakita nga balita parte sa mga Saksi ni Jehova ang mga tawo sa sini nga teritoryo. Gani tion na nga magbantala.

Ang Dios isa lang kag mabuligan niya kita bisan hilway man kita ukon ara sa prisuhan. Gani wala kita ginapabay-an. Kaupod naton sia bisan diin basta magpabilin kita nga matutom sa iya. Sa akon bahin, kumbinsido ako nga nahibaluan sang Dios ang akon masarangan bangod sa akon edad, kag ang kabakod sang akon kaangtanan sa iya. Gani kon kabubut-on niya, ibutang niya sa hunahuna kag tagipusuon sang nagadumala nga hukom nga pasugtan ang imo petisyon para sentensiahan ako, Madam Naumova. Ginahulat ko ang Abril 1. Ang Hebreo 13:6 nagapasalig sa akon: “Si Jehova ang akon manugbulig; indi ako magkahadlok. Ano ang mahimo sang tawo sa akon?” Si Jehova nga Dios mismo ang magabulig sa akon. Sin-o ang kahadlukan ko?

Sergey Skrynnikov