OKTUBRE 28, 2021
RUSSIA

Isa ka 80 Anyos nga Retirado nga Maestra ang Gin-akusar Bangod sa Iya Pag-istorya Parte sa Biblia

I-PLAY

UPDATE | Gin-deny sang Korte sa Russia ang Pag-apelar ni Sister Yelena Savelyeva

Sang Pebrero 14, 2022, gin-deny sang Tomsk Regional Court ang pag-apelar ni Sister Yelena Savelyeva. Indi niya kinahanglan nga mapriso sa sini nga tion.

Time Line

Nobiembre 17, 2021

Ang Severskiy City Court of the Tomsk Region nagdesisyon nga guilty si Yelena kag ginsentensiahan sia sang apat ka tuig nga suspended prison. Gusto sadto sang piskal nga multahan sing 500,000 rubles ($7,198 U.S.) ang 80 anyos nga si Yelena.
Hulyo 22, 2021

Ginhiwat ang una nga hearing sa korte
Marso 25, 2021

Ginpasakaan sang kaso sang piskal si Yelena. Gin-akusar sia nga “nagaengganyo ukon naga-recruit sa isa ka tawo nga makigbahin sa hilikuton sang isa ka extremist nga organisasyon.” Base ini sa Article 282.2 sang Criminal Code of the Russian Federation.

Ini nga akusasyon ginbase sa testimonya sang duha ka babayi nga naistorya ni Yelena parte sa Biblia: isa ka FSB agent kag isa ka empleyado sang Russian National Guard. Nagpakunokuno sila nga interesado sa Biblia, pero samtang nagapakig-istorya sa ila si Yelena sekreto nila nga ginrekord ini. Dayon ginpadala nila sa mga awtoridad ang impormasyon parte sa iya kag sa iya mga masigkatumuluo

Impormasyon Parte sa Iya

Yelena Savelyeva

Natawo: 1941 (Katka, Republic of Belarus)

Biograpiya: Nagdaku sia nga pigado gid bangod sa epekto sang World War II. Nag-eskwela sia sing physics kag mathematics sa unibersidad kag nangin maestra sa sulod sang sobra 40 ka tuig antes magretiro. Sang 1963, napamana niya si Leonid, nga isa ka nuclear physicist. May duha sila ka bata nga lalaki

Pamatan-on pa lang sia, interesado na sia parte sa Dios. Kon mangamuyo sia, pirme sia nagapamangkot: “Ano ang katuyuan sang akon kabuhi? Ano ang mahimo ko para sa imo?” Nakita niya sa Biblia ang sabat sa iya mga pamangkot. Nabawtismuhan sia bilang isa sa mga Saksi ni Jehova sang 2002

Ang Iya Ginsiling

Ano ang ginhimo mo para indi magluya ang imo buot bisan ginahingabot ka?

Sang nabasa ko ang akusasyon batok sa akon, daw indi ako makapati. Naglalain gid ako! Nasakitan gid ako sang gintawag nila ako nga kriminal. Puede gid tani nga magluya ang imo buot kon mabasa mo ina nga akusasyon. Pero dapat naton dumdumon nga “ang nagbatas tubtob sa katapusan maluwas.”—Mateo 10:22.

Paano ka ginbuligan sang mga kauturan sa sini nga tion?

Sang nagsugod ang hearing, mga sister gid ang kalabanan nga naga-attend sa korte. Masami nga mga 12 asta 18 ka tawo ang nagakadto sa korte para suportahan ang gin-akusar. Nagkadto man ang mga kauturan para suportahan ako. Ginaistorya nila ako kag ginapalig-on ako kag ginabasahan nila ako sang teksto sa Biblia. Ginasilingan nila ako nga indi mahadlok, nga unungan nila ako, kag ginalakip nila ako sa ila pangamuyo. Nalipay gid ako kay nahibaluan ko nga palangga nila ako kag ginapangabay nila ang Dios nga buligan ako nga mangin matutom pirme. Importante gid para sa akon ang ila bulig.

Determinado gid si Yelena nga magpadayon nga mangin matutom bisan pa ginahingabot sia, kag nagapalig-on gid ini sa aton. Nagasalig kita nga nakita gid ni Jehova ang tanan nga ‘nagapanikasog sing tingob tungod sa pagtuo sa maayong balita, kag wala gid nagakahadlok sa ila mga kasumpong.’—Filipos 1:27, 28.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE