Ginapaabot nga ipahibalo sang Karpinsk City Court ang desisyon sini sa Lunes, Enero 27, 2020, sa kaso sang duha ka sister nga sanday Venera kag Darya Dulova kag sang isa ka brother nga si Aleksandr Prianikov. Gusto sang piskal nga silutan sing tatlo ka tuig nga suspended prison sentence sanday Brother Prianikov kag Sister Venera Dulova. Gusto man niya nga silutan sing duha ka tuig nga suspended sentence si Sister Darya Dulova.

Sang Abril 19, 2016, sanday Brother Prianikov kag Sister Venera Dulova nagpakig-istorya sa isa ka lalaki parte sa Biblia. Ang paryente sini nga tawo nag-akusar kay Brother Prianikov kag kay Sister Dulova nga nagpangawat kag nagtawag sia sang mga pulis. Gindala sila nga duha sa presinto. Ginkuhaan sila sang fingerprint kag ginpanguha ang ila mga literatura.

Pagligad sang sobra duha ka tuig, gin-aresto sila liwat kag ginkuestyon base sa amo gihapon nga insidente. Ginpanguha ang ila mga cellphone kag iban pa nga personal nga mga dokumento. Ang hepe sang pulis nag-asayn sang isa ka propesor sang theology para usisaon ang impormasyon nga ara sa mga cellphone nanday Brother Prianikov kag Sister Dulova. Suno sa 15-ka pahina nga report sang propesor, nakita sa ila mga cellphone ang mga panudlo sang mga Saksi ni Jehova. Bangod sini, ginpasakaan sila sang kaso kriminal sang piskal. Dayon, gintugutan sang Karpinsk City Court ang mga pulis nga halughugon ang ila mga balay.

Sang ginahalughug nila ang apartment ni Sister Dulova, ginpanguha sang mga pulis ang mga gadyet, libro, kag retrato. Gin-usisa man nila ang 18-anyos nga bata nga babayi ni Sister Dulova nga si Darya. Ginhalughug man sang mga pulis ang balay sang ila mga paryente lakip na ang apartment ni Brother Prianikov.

Sa liwat, sang aga sang Abril 16, 2019, gin-raid sang tatlo ka Federal Security Service (FSB) agent, isa ka imbestigador, kag duha ka pulis ang balay ni Brother Prianikov. Ginpanguha sang mga pulis ang mga gadyet kag personal nga mga gamit.

Sang Hulyo 23, 2019, si Sister Darya Dulova gin-aresto para kuestyunon bilang isa ka suspek sa kaso kriminal nga ginpasaka sa iya iloy kag kay Brother Prianikov. Sila nga tatlo gin-akusahan nga naghimo sang krimen, kag ang pagbista sa ila kaso nagsugod sang Septiembre 2019.

Para sa sining tatlo ka Saksi kag sa halos 300 pa naton ka kauturan nga nagaatubang sang kaso kriminal kag pagkapriso sa Russia, nagapangamuyo kita nga may bug-os nga pagsalig: “Kabay pa nga ang Dios nga nagahatag sing paglaum maghatag sa inyo sing kalipay kag paghidait bangod sang inyo pagtuo sa iya, agod mapabakod pa ang inyo paglaum paagi sa gahom sang balaan nga espiritu.”—Roma 15:13.