MAYO 6, 2024
RUSSIA

“Kontrolado Gid ni Jehova ang Tanan”

I-PLAY

Sa indi madugay, ipahibalo sang Khorolskiy District Court of the Primorye Territory ang desisyon sini parte sa kaso nanday Brother Boris Andreyev, Brother Anatoliy Li, kag Sister Nataliya Sharapova. Wala pa sing ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Boris Andreyev

Natawo: 1951 (Monastyrishche, Primorye Territory)

Biograpiya: Nag-obra sia bilang dispatch agent sa mga emergency response team

Nasabat sang Biblia ang iya mga pamangkot gani nakumbinsi sia nga nakit-an niya ang kamatuoran. Nabawtismuhan sia bilang isa sa mga Saksi ni Jehova sang 2004

Napangasawa niya si Aleksandra sang 2020

Ang Ginsiling sang Iya Asawa nga si Aleksandra a

Paano ka ginbuligan sang imo bana nga mabatas ining mabudlay nga tion?

Ang isa ka mabudlay gid nga adlaw amo sang gin-aresto si Boris. Grabe gid ang akon kasubo, kag naghilibion ako. Sa akon sulat kay Boris, ginsugid ko sa iya kon ano ang natabo kag kon ano ang nabatyagan ko. Nagbalos sia sa akon sulat kag ginpaumpawan niya ako kag nagsiling sia nga naintiendihan niya ang akon ginabatyag. Pero ang pinakaimportante, ginpahanumdom niya sa akon ang tanan nga kabudlayan namon sang una nga nasarangan namon bangod sa bulig ni Jehova. Amo gid ’to ang kinahanglan ko kag mas nakumbinsi ako nga indi gid kita pagpabay-an ni Jehova.

Anatoliy Li

Natawo: 1985 (Uzbekistan)

Biograpiya: Nagsimba sia sa sarisari nga simbahan pero wala gid nasabat ang iya mga pamangkot. Nagpa-Bible study sia upod sa mga Saksi ni Jehova kag nalipay sia matun-an ang kamatuoran sa Biblia. Nabawtismuhan sia sang 2010

Napangasawa niya si Raisa sang 2011

Ang Ginsiling sang Iya Asawa nga si Raisa b

Paano mo kag sang imo bana nabatyagan ang bulig ni Jehova?

Wala lang madugay nga ginbutang sia sa pretrial detention center, ginsilingan ako ni Anatoliy nga nabalaka gid sia sa akon kay wala na ako sing kaupod. Antes sia gin-aresto, updanay gid kami adlaw-adlaw sa pagtuon sa Biblia kag pagpangamuyo. Pero nadula ang iya kabalaka sang nabal-an niya kon paano ako ginhatagan ni Jehova sang tanan nga kinahanglanon ko, paagi sa mga utod. Nakita namon nga duha nga nagaulikid gid si Jehova sa amon kag indi niya gid kami pagpabay-an.

Nataliya Sharapova

Natawo: 1972 (Kazakhstan)

Biograpiya: Nakilala niya ang mga Saksi sang 1995 kag nagpa-Bible study sia. Nakumbinsi sia nga Pulong sang Dios ang Biblia. Nabawtismuhan sia sang 2012

Ang Ginsiling sang Iya Nanay nga si Nina c

Ano ang nakabulig kay Nataliya nga magpabilin nga positibo bisan ara sia sa pretrial detention center?

Sarisari nga kabudlayan ang ginaatubang sang akon bata sa detention center. Matugnaw gid didto. Pirme man nagasakit ang iya ulo. Bisan pa ginasubuan sia kon kaisa, sigurado sia nga kontrolado gid ni Jehova ang tanan. Nagsiling sia: “Kabalo ’ko nga temporaryo lang ako diri. Ginahatagan ako ni Jehova sang pasensia, kag handa gid ako maghulat.” Ini nga mga kabudlayan nagpasuod pa gid kay Nataliya kay Jehova. Daw pareho lang nga ginahakos sia ni Jehova.

Pareho sang pagsabat ni Jehova sa mga pangamuyo nanday Anatoliy, Boris, kag Nataliya, nagasalig man kita nga padayon nga sabton ni Jehova ang aton mga pangamuyo sa tion sang aton kabudlayan kag hatagan kita sang kusog nga makabatas.—Salmo 20:1.

Time Line

Hulyo 28, 2022

Ginsugdan ang ila kaso
Oktubre 6, 2022

Dose ka balay ang gin-raid sa baryo sang Yaroslavsky. Ginbutang si Boris kag si Nataliya sa temporary detention center
Oktubre 7, 2022

Ginsaylo si Boris kag si Nataliya sa pretrial detention center
Oktubre 12, 2022

Ginbutang si Anatoliy sa temporary detention center
Oktubre 13, 2022

Ginsaylo si Anatoliy sa pretrial detention center
Oktubre 5, 2023

Ginsugdan ang hearing

a b c Samtang ginahanda ini nga artikulo, sanday Brother Andreyev, Brother Li, kag Sister Sharapova ara sila sa pretrial detention. Wala sila mainterbyu.

Tan-awa Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE