Sang Oktubre 28, 2020, wala nagpasugot ang Dimitrovgrad City Court sang Ulyanovsk Region nga multahan na lang si Brother Konstantin Bazhenov para temprano sia nga makagua sa prisuhan. May pulo sia ka adlaw para mag-apelar.

Sang ginbutang si Brother Bazhenov sa pretrial detention sang Hunyo 2018, nakabatyag man sia sing kahadlok. Pero, may notebook sia nga amat-amat niya nga ginsulatan sang mga teksto sa Biblia nga madumduman niya kag mga 500 ka teksto ang iya nasulat. Sang ulihi, ginhatagan sia sing Biblia, kag natapos niya ini basa sa sulod lang sang apat ka bulan. Naghimo man si Brother Bazhenov sing mga sulat para palig-unon ang iban paagi sa pagsugid sa ila sang mga nabasahan niya sa Biblia. Pirme man sia nagakanta sang mga Kingdom song kag nagapangamuyo kay Jehova nga buligan sia.

Si Brother Bazhenov nagtener sing sobra 340 ka adlaw sa pretrial detention. Ginpamatbatan sia nga guilty kag ginsentensiahan nga mapriso sing tatlo ka tuig kag tunga sang Septiembre 2019. Bisan pa sini, ginpadayon niya ang pagtuon sa Biblia kag pagpangamuyo kay Jehova. Kag sa bulig ni Jehova, nasaulog man ni Brother Bazhenov ang Memoryal sa prisuhan. Ang suod nga relasyon ni Brother Bazhenov kay Jehova amo gid ang nakabulig sa iya nga mangin malipayon samtang ginabatas niya ang paghingabot. Kabay pa nga pirme naton ilakip si Brother Bazhenov sa aton mga pangamuyo.