Sang Oktubre 26, 2020, liwat nga gin-deny sang Lgov District Court ang temprano nga pagpagua kay Brother Dennis Christensen, nga halos tatlo ka tuig na nga ginpriso. Ang sentensia sa iya nakaiskedyul nga matapos sa Mayo 2022. Dapat ini buhinan sang kalawigon sang tion nga gintener niya sa pretrial detention, antes sia ginsentensiahan. Pero sang nagligad nga bulan, ang mga awtoridad sa prisuhan nagsiling nga si Brother Christensen “hungod nga nagalapas” sa mga mando sang prisuhan. Buot silingon, posible nga indi pag-ibuhin sang mga awtoridad ang tion nga gintener niya sa pretrial detention, kag mahimo pa maglapaw sa Mayo 2022 ang pagpriso sa iya.

Sugod sang gin-aresto sia sang Mayo 25, 2017, si Brother Christensen kag ang iya asawa nga si Irina, madamo na sing ginbatas nga mga kabudlayan sa pisikal, mental, kag emosyonal. Pero wala madula ang ila kalipay kag determinado sila nga padayon nga batason ini nga pagtilaw sa ila pagtuo. Ang isa nga nakabulig sa ila amo ang minilyon ka pangamuyo sang aton mga kauturan sa bilog nga kalibutan.