Sang Martes, Mayo 7, 2019, sa Oryol Regional Court, nagsugod ang pagbista sa appeal ni Dennis Christensen sa anom ka tuig nga sentensia sa iya bangod sa paghimo sang mga hilikuton sang iya relihion. Ginsunod sini nga korte ang ginhimo sang iban nga mga korte sa Russia, kay wala sini ginbinagbinag sing maayo ang mabakod nga mga ebidensia nga ginpresentar sang mga abogado sang depensa nga nagapamatuod nga inosente si Dennis. Mahimo ipapanaug sini nga panel sang tatlo ka hukom ang ila desisyon sa katapusan sini nga semana.

Sa una nga adlaw sang pagbista, madamo nga kauturan ang nagkadto sa korte para suportahan si Dennis. Madamo man ang nagtambong nga mga diplomat halin sa sarisari nga pungsod, journalist, kag mga nagasakdag sa kinamatarong sang tawo. Ang pagbista ginsugdan sa isa ka gamay nga kuarto, nga mga 20 asta 25 lamang ka tawo ang makaigo, gani sobra pa 50 ang wala ginpasulod. Pero ginpasugtan sang korte ang pangabay sang mga abogado ni Dennis nga isaylo ang pagbista sa mas daku nga kuarto nga mga 80 ka tawo ang makaigo. Ang pagbista sina nga adlaw gin-untat pagkatapos lamang sang tatlo ka oras.

Sang ikaduha nga adlaw sang pagbista, wala ginpasugtan sang mga hukom ang pangabay sang mga abogado sang depensa nga usisaon liwat ang mabakod nga ebidensia nga inosente si Dennis. Masubo gid nga wala nagpasugot ang mga hukom, kay kumbinsido ang mga abogado ni Dennis nga maathag sa ebidensia nga ang una nga desisyon nga nakasala sia wala sing basihan. Sang matapos ang pagbista sina nga adlaw, ginapahibalo sang korte nga ang pagbista padayunon sa Huebes, Mayo 16, diin magahatag sang ila katapusan nga argumento ang mga abogado.

Padayon namon nga ginapangamuyo nga ang aton kauturan sa Russia magapabilin nga may paghidait kag mabakod nga pagtuo sa promisa ni Jehova nga maabot ang tion nga luwason sila sa mga nagatamay sa ila.—Salmo 12:5.