Sa Enero 22, 2020, ginapaabot nga desisyunan ang kaso batok kanday Brother Roman Markin kag Brother Viktor Trofimov. Gusto sang piskal nga sentensiahan sila sang korte sang anom ka tuig kag tunga nga pagkapriso.

Nagsugod ang pag-antos sini nga mga brother sang Abril 18, 2018, sang ginsulod sang armado nga mga pulis, nga may tabon ang mga guya, ang ila mga balay sa siudad sang Polyarny sa Russia. Tungang gab-i na sang nag-abot ang mga pulis sa balay ni Brother Markin kag ginguba nila ang puertahan. Gintayaan nila si Brother Markin sing awtomatik nga mga armas, kag puersa nga ginpahapa nila sia sa salog samtang ginahalughog nila ang iya balay. Ang 16-anyos nga bata nga babayi ni Brother Markin, nga ara sa tion sang raid, naghapa man sa salog kag ginbutang niya ang iya mga kamot sa iya ulo.

May apat pa gid ka balay sang mga Saksi nga gin-raid man sang sina nga gab-i sa Polyarny. Ginpangdala sang mga pulis sa presinto ang sobra 12 ka kauturan lakip sanday Brother Markin kag Brother Trofimov para kuestyunon. Dayon, ang Polyarny District Court sang Murmansk nagdesisyon nga prisuhon sanday Brother Markin kag Brother Trofimov bisan wala pa sila mabista. Ang mga brother napriso sing halos anom ka bulan, dayon gin-house arrest sila sing apat ka bulan. Sang Pebrero 7, 2019, nagdesisyon ang korte nga indi na sila pag-i-house arrest. Pero bisan makagua na sila sa ila mga balay, ginlimitehan ang ila pagbiyahe kag pagpakig-istorya sa iban samtang ginahulat nila ang desisyon sang korte.

May halos 300 ka mga Saksi nga ginpasakaan sang kaso kriminal sa Russia. Ginapangamuyo naton nga tanan sila magpadayon nga mangin maisog kag mabakod, kumbinsido nga wala sing makapugong nga mabaton nila ang gugma ni Jehova.—Roma 8:38, 39.