Sa indi madugay, ipahibalo sang Birobidzhan District Court of the Jewish Autonomous Region ang desisyon sini sa kaso nanday Brother Alam Aliyev, Brother Valeriy Kriger, Brother Sergey Shulyarenko, kag Brother Dmitriy Zagulin. a

Alam Aliyev

• Natawo: 1963 (Lyaki Village, Azerbaijan)

• Biograpiya: Nagserbisyo sia bilang soldado sang Soviet Union sa Germany. Sang ulihi, nagtrabaho sia sa isa ka fishing boat. Nagsaylo sia sa Khabarovsk, Russia, sang 1989. Subong, nagatrabaho sia bilang isa ka operator sang mga makina sa isa ka pabrika

  Wala madugay sa tapos niya magsaylo sa Russia, nagtuon sia sing Biblia. Nabawtismuhan sia sang 1991. Napangasawa niya si Svetlana, sang 2015. Nanamian sila maglagawlagaw para ma-enjoy ang palibot

Valeriy Kriger

• Natawo: 1968 (Jewish Autonomous Region)

• Biograpiya: Nagdaku sia sa isa ka pamilya nga indi relihioso. Sang bata pa sia, mahilig sia sa gymnastics. Nagtuon sia sing massage therapy kag subong amo ini ang iya negosyo. Nabawtismuhan sia sang 1994. Napangasawa niya si Natalya sang 2017. Mahilig sila maghampang sing volleyball kag maglagawlagaw para ma-enjoy ang palibot

Sergey Shulyarenko

• Natawo: 1984 (Khabarovsk)

• Biograpiya: Sang bata pa sia nag-istar sia sa Turkmenistan kay nagaserbisyo didto bilang soldado ang iya amay. Nangin assistant sia sang operator sang mga makina. Nanamian sia magdrowing kag magtuon sang iban nga lenguahe. Natun-an niya ang parte kay Jehova sa iya iloy. Nabawtismuhan sia sang 1997 sang 13 anyos sia

Dmitriy Zagulin

• Natawo: 1973 (Khabarovsk)

• Biograpiya: Sang bata sia, gusto niya mangin soldado. Nakatuon sia sang martial art kag gin-train sia kon paano maggamit sing parachute. Subong, nagatrabaho sia sa isa ka railroad company. Nagtuon sia sing Biblia sang 1991 kag nabawtismuhan sia sang 1992. Napangasawa niya si Tatyana sang 2012

Sang Mayo 17, 2018, sa isa ka operasyon nga ginatawag “Adlaw sang Paghukom,” gin-raid sang 150 ka pulis ang mga balay sa Birobidzhan. Gin-akusahan si Brother Alam Aliyev nga “nagaorganisar sang mga hilikuton sang isa ka extremist nga organisasyon” kag ginpriso sia sing walo ka adlaw. Gin-akusahan man sanday Brother Valeriy Kriger, Brother Sergey Shulyarenko, kag Brother Dmitriy Zagulin. Gindumilian ining apat ka brother nga maghalin sa ila lugar. Dugang pa, ang mga asawa nanday Alam, Valeriy, kag Dmitriy ginpasakaan man sang kaso.

Antes gin-aresto si Alam, gin-research na niya kon paano niya mabatas ang paghingabot. Ginsugid man niya ang iya natun-an sa mga kauturan sa kongregasyon. Nagsiling sia: “Ginpalig-on ko ang mga kauturan nga indi mahadlok kon hingabuton sila. Tayming gid ini kay pagligad lang sang isa ka semana, gin-raid ang mga balay sang 21 ka pamilya sa amon kongregasyon.”

Si Valeriy kag ang iya asawa nga si Natalya, wala naka-attend sa kombension sang mga Saksi ni Jehova sa Seoul, South Korea, kay gindumilian sila nga magbiyahe sa iban nga lugar. Wala man sila ginpasugtan nga bisitahan ang ila mga ginikanan sa Israel. Ang masubo kay napatay ang iya tatay sang Pebrero 2019. Pila ka bulan antes sini, gin-operahan ang iya iloy sa taludtod kag kinahanglan gid nga may mag-atipan sa iya. Nabatyagan gid ni Valeriy nga ginabuligan sia ni Jehova. Bisan pa indi mga Saksi ni Jehova ang iya mga ginikanan, ang iya mga kauturan sa Israel amo ang nagaatipan sa iya iloy. Nagsiling sia: “Ginpangamuyo namon kay Jehova ang sitwasyon ni Nanay, kag ginsabat gid kami ni Jehova. Ginapaumpawan kag ginapalig-on sang mga kauturan sa Israel si Nanay. Ginabisitahan nila sia, ginaistorya, kag ginaagda nga mag-attend sa mga miting. Bisan pa nga indi namon kaupod si Nanay, nakita namon kon paano sia ginabuligan ni Jehova paagi sa amon mga kauturan.”

Mas napamatud-an ni Dmitriy ang isa ka kamatuoran nga nabal-an na niya sang una pa. Nagsiling sia: “Kon maayo ang sitwasyon kag wala sing nagabalabag sa aton pagsimba sa Dios, posible nga balewalaon lang naton ang aton pribilehiyo nga magsimba kay Jehova kag ang iya mga pagtudlo. Pero kon ginahingabot na kita sang mga awtoridad kag indi na kita makasimba sing hilway, maintiendihan gid naton kon daw ano ka importante nga panginpuslan ang panahon subong para makahanda kita sa tion nga hingabuton kita. Gani maayo gid nga gamiton naton ang aton kahilwayan subong para ‘magtipon sing mga bahandi sa langit.’ Magapabakod ini sang aton pagtuo para makabatas kita asta sa katapusan.”—Mateo 6:20.

Maathag gid nga ginahatagan ni Jehova ang aton mga kauturan sa Russia sing “gahom nga labaw sa kinaandan” para makabatas sila.—2 Corinto 4:7.