Sang Marso 31, 2021, ang Birobidzhan District Court of the Jewish Autonomous Region nagdesisyon nga guilty si Sister Tatyana Zagulina. Ginsentensiahan sia sing duha ka tuig kag tunga nga suspended prison sentence.

Tatyana Zagulina

• Natawo: 1984 (Selektsionnaya Village, Trans-Baikal Territory)

• Biograpiya: Nagtuon sia sing fashion design. Nagtrabaho sia bilang manikyurista kag sastre, kag sagad sia sa pag-repair sing mga bayo para sa kasal. Nanamian sia maghampang sing volleyball kag table tennis. Nanamian man sia magsaot kag mag-knit

  Nanamian gid sia sang palibot kag nagapati gid sia nga gintuga ang kabuhi. Amo ini ang rason nga sang ulihi nagtuon sia sing Biblia upod sa mga Saksi ni Jehova. Nabawtismuhan sia sang 2010. Napamana niya si Dmitriy sang 2012

Sang Mayo 17, 2018, gin-raid sang 150 ka pulis ang 22 ka balay sang mga Saksi ni Jehova. Ini nga operasyon gintawag sang mga awtoridad nga “Adlaw sang Paghukom.” Sugod sadto, ginkasuhan sing krimen sang mga imbestigador ang 22 ka kauturan sa sini nga lugar. Sang Pebrero 6, 2020, ginkasuhan sing “extremist” ang anom ka sister, lakip na si Tatyana.

Nagsugod ang pag-hearing sa kaso ni Tatyana sang Septiembre 17, 2020. Samtang ginahulat niya ang desisyon sa iya kaso, gindumilian sia sang awtoridad nga magbiyahe sa iban nga lugar kag gin-freeze man ang iya mga bank account.

Nagsiling si Tatyana nga ang pagpangamuyo kag padayon nga pagtuon sa Biblia amo ang nakabulig sa iya nga mabatas ang iya sitwasyon. Nakabulig man ini sa iya nga padayon nga magbantala kag pangapinan ang iya pagpati. Nagsiling sia: “Sang nag-abot ang mga [awtoridad], nakulbaan gid ako sang nanuktok sila. Gani, nangamuyo ako dayon. Pagkatapos ko pangamuyo amat-amat ako nga nagkalma.”

Halimbawa, sang ginhalughog sang mga pulis ang iya balay, ginsilingan niya ang isa ka pulis nga nagbakod gid ang iya pagtuo sadto nga adlaw. Sang ginpamangkot sia kon ngaa, nagsiling sia nga pamatyag niya natuman ang ginsiling ni Jesus sa Juan 15:20 nga nagasiling: “Ang ulipon indi labaw sa iya agalon. Kon ginhingabot nila ako, hingabuton man nila kamo.” Nagsiling pa sia: “Ang isa ka pulis nagsiling: ‘Sa ginsiling mo, pamatyag ko isa ako sa nagpatay kay Jesus.’ Sadto nga tion, nagbakod gid ang akon pagtuo. Nabatyagan ko man ang kalinong kag kalipay. Pamatyag ko ara gid si Jehova sa akon tupad!” Sang gin-hearing sia, ginkulbaan gid sia sa iya pag-atubang sa korte. Pero pagkatapos niya pangamuyo, nangin maisog gid sia kag nagsiling: “Wala na ’ko nakulbaan maghambal.”

Nagapasalamat gid kita kay Jehova kay padayon niya nga ginabuligan kag ginapakamaayo ang ‘buhat sang pagtuo, ang mahigugmaon nga pagpangabudlay, kag ang pagbatas’ sang aton pinalangga nga mga kauturan sa Russia.—1 Tesalonica 1:2, 3.