Sang Abril 20, 2022, lima ka tuig na sugod sang indi makatarunganon nga gin-ban sang Russia ang hilikuton sang mga Saksi ni Jehova. a Kada tuig sugod sang pag-ban, nagagrabe ang paghingabot sang mga awtoridad sang Russia, kag kon kis-a gina-torture pa nila ang aton kauturan. Pero, base sa mga report sa jw.org, nabatas ini sang aton maisog nga mga kauturan.

Maayo gid nga halimbawa si Brother Dennis Christensen, nga halos lima ka tuig na nga napriso. Sang napierde sia sa iya pag-apelar sang Mayo 2019, gilayon nga naghambal sia sing kalmado kag may kompiansa sa tanan nga kauturan nga nagsuporta sa iya sa korte: “Alagaron ko gid si Jehova sa pinakamaayo nga mahimo ko. Himuon ko ’na tubtob san-o.”

Amo man ina ang determinasyon ni Brother Igor Turik. Nadumduman niya sang naistorya niya si Brother Nikolay Kalibaba, nga ginhingabot sang panahon sang mga Soviet. Gintudluan ni Nikolay si Igor nga bangod sa mga pagtilaw makita sang katawhan ni Jehova kon paano sia nagabulig. Si Igor nagsiling, “Nangin maathag sa akon nga isa ka pribilehiyo nga mag-antos bangod sa aton pagtuo sa Dios.” Padayon nga nagabatas si Igor bisan pa ginsentensiahan sia sing pito ka tuig nga suspended prison.

Ginpaathag ni Brother Yevgeniy Fedin ang iya pagpati: “Indi ini ang tion para ipakigbato ko ang hustisya para sa akon kaugalingon. Kinahanglan naton magpanaksi nga ipasag-uli ni Jehova ang hustisya. Nagapakig-bato kita para mabaton naton ang pagpakamaayo . . . Kon ginapensar ko ini, nakabulig ini sa akon nga mangin husto ang akon panan-aw sa sini nga mga kabudlayan, bisan ano pa ang padulungan sini. Ang kada pagtilaw isa ka kahigayunan nga mahimaya si Jehova kag mangin matutom sa iya.”

Si Sister Tatyana Zhuk nagsiling man: “Kon pensaron naton kon ano ang aton nalampuwasan, mapahulag pa gid kita nga magpadayon nga magbatas sini nga mga kabudlayan. Nagapamatuod ini nga kaupod naton si Jehova. Imposible gid nga mangin malipayon kita sa sini nga sitwasyon kon wala kita ginabuligan sang aton Amay sa langit.”

“Kita ang nagdaug!” siling ni Yevgeniy, nga ginsambit kaina. “Ginabutang kita sa detention center, pero kita ang nagadaug. Ginapaatubang kita sa korte, pero kita ang nagadaug. Ginapriso kita, pero kita ang nagadaug.”

Antes ginpahibalo ang pag-ban sang 2017, si Dr. Emily Baran, nga isa ka historian kag nagatuon parte sa mga Saksi ni Jehova sa Soviet Union, nagsiling: “Kon ibase naton sa kasaysayan, imposible gid madula sang Russia ang mga Saksi ni Jehova.”

Nangin matuod gid ang tagna sa Isaias 54:17 para sa aton mga kauturan sa Russia kag Crimea: “Wala sing ginhimo nga hinganiban nga magmadinalag-on batok sa [ila].”