Sang Hulyo 19, 2021, nagdesisyon ang

Leninskiy District Court of the Kirov Region nga guilty sanday Brother Shamov, Brother Shchepin, kag Brother Udintsev. Si Brother Shamov ginmultahan sing 420,000 rubles ($5,618 U.S.), si Brother Shchepin sing 500,000 rubles ($6,688 U.S.), kag si Brother Udintsev sing 200,000 rubles ($2,675 U.S.).

Aleksandr Shamov

• Natawo: 1960 (Komarovo, Kirov Region)

• Biograpiya: Anom sila ka mag-ulutod. Napatay ang iya mga ginikanan sang bata pa sia. Anom pa lang sia ka tuig, nagaobra na sia sa ila uma. Naggradweyt sia sa isa ka technical college kag nangin manugkay-o sang TV. Napangasawa niya si Nadezhda sang 1986. May isa sila ka bata nga babayi. Sining karon lang, gin-heart attack sia kag gin-operahan, gani nakabaton sia sang disability pension. Nagtuon sila ni Nadezhda sang Biblia upod sa mga Saksi ni Jehova sang dekada ’90. Nabawtismuhan sia sang 2000

Andrey Shchepin

• Natawo: 1991 (Korolev, Moscow Region)

• Biograpiya: Natun-an niya ang kamatuoran sa iya mga ginikanan. Napangasawa niya si Ksenia sang 2015. Isa sia ka civil engineer. Nabawtismuhan sia sang 2010

Yevgeniy Udintsev

• Natawo: 1949 (Kirov)

• Biograpiya: May malala sia nga balatian sa tagipusuon sang bata pa sia. Sagad sia sa civil engineering kag metalworking. Napangasawa niya si Elizaveta sang 1970. Natun-an nila ang kamatuoran sa utod nga babayi ni Elizaveta sang 1991. Nakabulig sa iya ang iya gugma kay Jehova nga untatan ang iya grabe nga pagpanigarilyo kag pagpahubog. Nabawtismuhan sia sang 1996

Sang Marso 26, 2019, gin-raid sang mga pulis sa Russia ang 12 ka balay sang mga Saksi sa Kirov. Ginpanilagan man nila ang mga ginahimo sang mga Saksi. Pagkatapos sini, ginkasuhan sang piskal si Aleksandr, si Andrey, kag si Yevgeniy nga nakahimo sing krimen. Gin-detain si Andrey sing duha ka adlaw. Para sa piskal “extremist” nga hilikuton ang ila ginahimo nga pagsimba. Nalakip kuno sa krimen nga nahimo sang mga brother amo ang pagbasa sing Biblia kag pagkanta sing mga Kingdom song.

Ang nakabulig gid sa sini nga mga brother nga mabatas ang paghingabot sa ila amo ang pagsalig kay Jehova, sa iya organisasyon, kag sa Biblia. Halimbawa, nagbakod gid ang pagtuo ni Aleksandr sang ginpamalandungan niya ang halimbawa sang “tuman kadaku nga panganod sang mga saksi” nga mabasa sa Hebreo kapitulo 12. Nagsiling sia: “Halin pa sang una, bal-an na sang mga alagad sang Dios nga para mapakita nila ang ila pagtuo, dapat sila magbatas kag mangin maisog. Kon makaeksperiensia gani ako sang mabudlay nga sitwasyon, ginapamalandungan ko ang ila halimbawa. Kay man, mas grabe nga kapintas kag inhustisya ang ila naagyan. Nakabulig ini sa akon nga ‘makig-away sing lakas para sa pagtuo.’”—Judas 3.

Napalig-on gid si Andrey sang ginbasa niya ang eksperiensia sang matutom nga mga Saksi sa paggahom sang Nazi Germany kag sa anay Soviet Union. Nagsiling sia: “Nagdayaw gid ako sa ila kaisog.” Nagdayaw man sia kay ginsabat gid ni Jehova ang ila mga pangamuyo kag ginpadyaan ang ila katutom. Natun-an niya nga kon mangamuyo sia, dapat niya ihambal ang tanan niya nga pangabay kay Jehova. Nagsiling sia: “Nangamuyo ako kay Jehova nga buligan niya ako nga mangin maisog, nga hatagan niya ako sing kaisog, sing kaisog, kag sing dugang pa gid nga kaisog. . . . Kabalo kita nga nagakabuhi na kita sa mas mabudlay nga tion. Gani pribilehiyo gid naton subong nga buligan ang iban, nga maeksperiensiahan mismo ini nga kabudlayan, kag nga mas magsalig pa gid kay Jehova.”

Ginapangamuyo gid naton ang aton tatlo ka brother kag ang ila mga pamilya. Kabalo kita nga padayon sila nga paumpawan ni Jehova kag ‘palig-unon agod pirme sila maghimo kag maghambal sing maayo.’—2 Tesalonica 2:17.