Sang Enero 19, 2021, gin-deny sang Kemerovo Regional Court ang pag-apelar ni Brothers Sergey Britvin kag ni Vadim Levchuk. Ang una nga korte nga nag-uyat sang ila kaso nagdesisyon nga mapriso sila sing apat ka tuig. Bangod gin-deny sang Regional Court ang ila pag-apelar, ipatuman na ang sentensia sa ila. Pero bangod malawig na ang pag-house arrest sa ila kag ang pagtener nila sa pretrial detention, daw pareho lang nga napriso na sila sing sobra tatlo ka tuig. Gani, mga isa na lang ka tuig sila nga prisuhon. Determinado gid sila nga duha nga mangin malig-on kag himuon ang ila bug-os nga masarangan nga maalagad si Jehova bisan sang ila sitwasyon.

Sa katapusan nga pag-hearing sa ila sa una nga korte, maisog nga ginhambal sining duha ka brother ang parte sa ila pagtuo kay Jehova kag kon paano sila nakabenepisyo sa pag-alagad nila sa iya.

Amo ini ang ginsiling ni Sergey sa korte: “Ano ang gusto sang mga nagasumbong sa akon nga himuon ko? Isikway ko ang akon pagtuo? Sa tuod lang, ang pagtuo ko kay Jehova amo ang nakabulig sa akon nga bag-uhon ang akon kaugalingon kag mangin maayo nga pumuluyo sang Russia. Nagapasalamat gid ako sa Dios nga ginbuligan niya ako nga mangin mas maayo nga tawo kag ginbuligan man niya ako para mangin mas malipayon kami sang akon asawa. Salamat gid kay Jehova kay nabatyagan ko subong nga may pulos ang akon kabuhi kag may matahom ako nga palaabuton. Ang pinakaimportante para sa akon amo nga suod ako sa akon Dios nga si Jehova. Abyan ko sia, bisan ano pa ang butig nga mga akusasyon nga ginasumbong sa akon.”

Si Vadim nagsiling: “Sugod sang gin-aresto ako, nabatyagan ko nga ginabuligan ako ni Jehova kay kalmado lang ako pirme. Gani, determinado gid ako nga mangin matutom sa iya. Bisan ano man ang desisyon sang korte, ang pinakaimportante sa akon amo nga napalipay ko ang Dios. Bisan diin man ako, padayon ko nga tinguhaan nga mapakita ang mga kinaiya nga makapalipay sa Dios, pareho sang gugma, kalipay, paghidait, maayo nga kabubut-on, pagtuo, kalulo, kag pagpugong sa kaugalingon.”