Sa Marso 1, 2021, a mahimo ipahibalo sang Priokskiy District Court of Nizhny Novgorod ang desisyon sini sa kaso ni Brother Sergey Verkhoturov. Mahimo sia mapriso sing pito ka tuig.

Sergey Verkhoturov

• Natawo: 1974 (Baikalsk, Irkutsk Region)

• Biograpiya: Pulo ka tuig sia nga nangin elektrisyan. Sining karon lang, nagtrabaho sia bilang legal adviser sang isa ka industrial company

• Bata pa lang sia, interesado na sia sa Biblia. Sang nagatrabaho na sia, nagdayaw gid sia sa maayo nga paggawi sang isa niya ka kaupod sa trabaho nga nagatuon sing Biblia upod sa mga Saksi ni Jehova. Gani, nagtuon man sia sing Biblia. Nagdayaw gid sia sa simple pero mapatihan nga mga panudlo sang Biblia. Nabawtismuhan sia sang 1995. Sang 2001, napangasawa niya si Viktoriya

Sang Hulyo 16 kag 17, 2019, gin-raid sang mga awtoridad sang Russia ang 35 ka balay sang mga Saksi ni Jehova sa Nizhny Novgorod Region, lakip ang balay sang pamilya Verkhoturov. Sang gin-raid sang mga pulis ang iya balay, si Sergey nagsiling: “Kalmado lang ako kag daw wala ako masyado nagakabalaka.” Dayon, ginpahog sia sang mga pulis nga prisuhon nila si Viktoriya kon indi niya pag-isugid ang kompidensial nga mga impormasyon. “Grabe gid [ini] kabudlay para sa akon,” siling ni Sergey. Ginbuligan sia ni Jehova nga mangin malig-on, kag wala man napriso si Viktoriya. b

Nagsiling sia: “Natun-an ko nga indi gid dapat mahadlok sa mga wala pa matabo, bangod sa masami lain sangsa ginahunahuna mo ang nagakatabo. Kon makaeksperiensia ka sang mga pagtilaw, marealisar mo nga para sa iban daw indi ini masarangan. Kon makaeksperiensia ka sang pagtilaw kag nabatas mo ini, mabatyagan mo nga ginabuligan ka gid ni Jehova.”

Ang nakabulig kay Sergey nga mangin malipayon gihapon amo ang paghimo sang mga hilikuton para kay Jehova kag para sa iban. Nagsiling sia: “Isa lang gid ang gusto ko himuon. Gusto ko nga mahimaya ang ngalan ni Jehova. Pirme ko gid ini ginapangamuyo kag padayon ko ini nga himuon. Ginapangamuyo ko man nga makabatas ako para mapadunggan ko ang iya ngalan kag mangin maayo nga panaksi para sa iban. Halin sang nagsugod ini nga paghingabot, ang mga tawo nga nakilala ko wala gid sing nahibaluan parte sa Dios ukon diutay lang ang ila nahibaluan parte sa iya. Ginapangamuyo ko gid kay Jehova nga kabay pa nga buligan niya sila nga makatuon pa gid parte sa iya kag mangin mga abyan niya.”

Samtang padayon nga ginahingabot ang aton mga kauturan sa Russia, masiling man naton ang ginsiling ni apostol Pablo: “Kabay nga ang Ginuo sang paghidait maghatag pirme sa inyo sang paghidait sa tanan nga paagi. Kabay nga ang Ginuo mangin kaupod ninyo tanan.”—2 Tesalonica 3:16.