AGOSTO 23, 2023
RUSSIA

“Mas Nagabakod Pa Gid Ako”

I-PLAY

Sa indi madugay, ipahibalo sang Lesosibirsk City Court of the Krasnoyarsk Territory ang desisyon sini sa kaso ni Brother Valeriy Schitz. Wala pa sang ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Iya

Valeriy Schitz

Natawo: 1966 (Bolshaya Murta, Krasnoyarsk Territory)

Biograpiya: Nag-obra sia sa konstruksion

Napangasawa niya si Irina sang 1987. May duha sila ka bata nga lalaki

Nagpa-Bible study sila nga duha sang iya asawa sa mga Saksi ni Jehova. Nagdayaw gid sila kon paano nagakatuman ang mga tagna sa Biblia kag kon paano ang mga panudlo sini nakabulig para mangin maayo ang ila kabuhi. Nabawtismuhan sila nga duha sang 2008

Ang Iya Ginsiling

Ano ang natun-an mo sa bulig halin sa imo mga kauturan?

Sang nabatian sang amon mga kauturan ang natabo sa amon, handa gid sila nga magbulig kag ginpabatyag nila nga palangga gid nila kami. Kaalwan gid sa ila kag handa sila nga ihatag ang ila tion kag kusog para sa amon. Ginaako ko nga nabudlayan ako mangabay sang bulig sang iban sa umpisa. Mas malipayon ang nagahatag sangsa nagabaton, kag halin sang una ako ang nagahatag sa iban. Pero kinahanglan ko bag-uhon ang akon panghunahuna kag dapat mangin handa ako sa pagbaton sang bulig. Bangod ginhimo ko ini, nangin malipayon ako kay nakita ko kon paano ginasunod sang iban ang halimbawa ni Jehova kag ni Jesus sa pagpakita sang gugma.

Ano ang nagapalig-on sa imo nga indi mangampo?

Matestingan gid ang pagtuo sang tanan nga Cristiano. Posible indi man pagkapriso, pero may ara gid sang balatian, inhustisya, ukon mapatyan sang pinalangga. Ang Santiago 1:3 nagapahanumdom sa akon nga ang ‘akon pagtuo nga natilawan nagaresulta sang pagbatas.’ Gani, nagapangamuyo gid ako sing regular kay Jehova kag ginasugid ko sa iya ang akon ginabatyag. Kag kon sigesige ako nga nagapangamuyo, nagabakod pa gid ang akon pagpakig-abyan sa iya. Dugang pa, nagabakod pa gid ako kay nabal-an ko nga ang mga kauturan sa bilog nga kalibutan nagapangamuyo para sa akon. Posible paluyahon sini nga paghingabot ang akon pisikal nga kusog kag limitahan ang akon ginahimo, pero indi gid ini magamadinalag-on. Mas nagabakod pa gid ako.

Naumpawan kita kay nabal-an naton nga bisan ano pa nga pagtilaw ang aton maeksperiensiahan, padayon kita nga suportahan ni Jehova kag sang aton mga kauturan.—1 Pedro 5:9, 10.

Time Line

Nobiembre 19, 2021

Ginsugdan ang kaso
Nobiembre 25, 2021

Gin-raid ang iya balay kag gindala sia para interogahon
Nobiembre 26, 2021

Gin-ban sia sa paghimo sang pila ka hilikuton
Mayo 18, 2022

Ginbutangan sang restriksion ang iya pagbiyahe
Abril 10, 2023

Ginsugdan ang hearing

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE