PEBRERO 9, 2024
RUSSIA

May Kaisog Sila kag Pagsalig kay Jehova

I-PLAY

Sa indi madugay, ipahibalo sang Blagoveshchensk City Court of the Amur Region ang desisyon sini sa kaso nanday Sister Kristina Golik, Sister Yekaterina Olshevskaya, Sister Mariya Myasnikova, kag Sister Valentina Yermilova. Wala pa sing ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Kristina Golik

Natawo: 1992 (Ukraine)

Biograpiya: Nagtuon sang graphics kag web design

Ikalima nga henerasyon sang mga Saksi ni Jehova. Nabawtismuhan sia sang 2006

Napamana niya si Dmitriy sang 2012. Nadesisyunan nga guilty si Dmitriy sang Hunyo 2021 kag ara sia subong sa prisuhan bangod sa sentensia nga anom ka tuig kag duha ka bulan

Ang Iya Ginsiling

Ano nga teksto sa Biblia ang nakabulig sa imo nga magpabilin nga malipayon?

Sa una nga tion nga naglayuay kami ni Dmitriy, wala ko kabalo kon ano ang akon batyagon sa sini nga inhustisya. Nahidlaw gid ako sa iya pagpaumpaw kag suporta sa akon. Nakitluoy ako kay Jehova nga buligan niya ako. Sang naga-Bible reading ako nabasahan ko ang Salmo 17. Natandog gid ako sang bersikulo 15: “Apang ako, makakita ako sa imo kay matarong ako; malipay ako nga makita ka sa pagbugtaw ko.” Subong, kon magbugtaw ako kada aga, ginadumdom ko nga ang akon Dios nga si Jehova, mas nakahibalo kon paano ako hatagan sing paumpaw kag pagpalig-on nga akon kinahanglan. Bisan pa sang akon mga problema, may rason gid ako pirme nga mangin malipayon.

Yekaterina Olshevskaya

Natawo: 1984 (Blagoveshchensk)

Biograpiya: Napamana niya si Anton sang 2010. May apat ka tuig sila nga bata nga lalaki

Si Anton kag ang tatay ni Yekaterina nga si Sergey Afanasiyev, nadesisyunan nga guilty sang Disiembre 2022 kag ara subong sa prisuhan bangod sa sentensia nga sobra anom ka tuig

Ang Iya Ginsiling

Paano nagbakod ang imo relasyon kay Jehova sa sining tion sang kabudlayan?

Sang nagligad nga lima ka tuig, nakapoy gid ako sang mga hearing sa korte parte sa mga kaso sang akon tatay, bana, kag subong ang akon nga kaso. Mahimo nga mapriso ako, kag kon matabo ini, ang amon apat ka tuig nga bata nga lalaki wala na sing ginikanan. Bisan pa sini, pareho gid ang ginbatyag ko kay Job sang nagsiling sia sa Job 42:5: “Sang una nabatian ko lang sa iban ang tuhoy sa imo, apang karon nakita ko na ikaw.” Bisan pa mabudlay ang akon sitwasyon kag indi ko kaupod ang akon bana, nabatyagan ko nga mas malapit ako kay Jehova subong. Ginsilingan ako ni Anton: “Bisan mapriso ako kag indi makaaman sa inyo, makita ninyo nga si Jehova ang pinakamaayo nga ulo sang pamilya. Atipanon gid niya kamo.” Ginpakita gid sa akon ni Jehova ang iya kaayo. Wala lang sia nagapamati kag nagabatyag sang kaluoy. Ginaaman gid niya ang akon emosyonal kag pisikal nga kinahanglanon, bisan antes ko pa ini pangayuon.

Mariya Myasnikova

Natawo: 1994 (Chernigovka, Amur Region)

Biograpiya: Nag-obra sia bilang manedyer sang opisina

Ang nanay ni Mariya nagtuon sa Biblia upod sa iya. Nanamian gid sia sang nagakatuman nga mga tagna sa Biblia kag sang paglaum nga kabuhi nga wala sing katapusan. Nabawtismuhan sia sang 2006

Napamana niya si Nikolay sang 2021

Ang Iya Ginsiling

Ano ang nakabulig sa imo nga mangin positibo bisan pa sang mabudlay nga mga sitwasyon?

Ginakabig ko ang mga pagtilaw nga isa ka oportunidad nga mapauswag ko ang akon Cristianong mga kinaiya. Ang bulawan ginatinluan sa mainit nga temperatura. Ang akon mga kabudlayan subong, makabulig nga mapauswag ko ang akon mga kinaiya nga ginapabaloran ni Jehova kag makabulig sa akon sa palaabuton. Nadumduman ko man ang ginsiling sa 1 Juan 2:17: “Ang kalibutan nagataliwan kag amo man ang kailigbon sini, apang ang isa nga nagahimo sang kabubut-on sang Dios nagapabilin sing dayon.” Ang tanan nga nagakatabo subong temporaryo lang. Bangod sini, may kusog ako nga padayon nga mag-alagad kay Jehova.

Valentina Yermilova

Natawo: 1970 (Shimanovsk, Amur Region)

Biograpiya: Nag-obra sia bilang laboratory technician

Napamana niya si Sergey sang 1995. May isa sila ka bata nga lalaki

Nalipay sia nga matun-an ang parte sa paglaum sang pagkabanhaw. Nabawtismuhan sia sang 2009

Nadesisyunan nga guilty si Sergey sang Disiembre 2022 kag ara subong sa prisuhan bangod sa sentensia nga anom ka tuig kag tatlo ka bulan

Ang Iya Ginsiling

Ano nga leksion ang imo natun-an sa sining mabudlay nga eksperiensia?

Natun-an ko nga indi ko dapat pagkabalak-an sing sobra ang akon sitwasyon subong. Kundi, dapat ko dumdumon nga ang pinakaimportante amo ang pagpakabalaan sa ngalan ni Jehova. Madamo nga tawo ang nagapensar nga kadungganan gid nga ihatag ang ila kabuhi para sa ila pungsod. Mas sobra pa sina ang kadungganan nga pangapinan ang ngalan ni Jehova. Gusto ko nga ihatag kay Jehova ang akon pinakamasarangan para madayaw sia. Kag nakahibalo ako nga indi gid niya ako pagbiyaan.

Nagapasalamat kita sa mga halimbawa sining mga sister nga nagsalig kay Jehova. Kag kabalo kita nga si Jehova padayon nga magaatipan kag magapakamaayo gid sa ila.—Salmo 27:3.

Time Line

Hulyo 20, 2018

Gin-raid ang ila mga balay
Hulyo 22, 2021

Ginkasuhan ang apat ka sister
Hulyo 27, 2021

Ginbutangan sing restriksion ang pagbiyahe ni Kristina kag Mariya
Agosto 3, 2021

Ginbutangan sing restriksion ang pagbiyahe ni Yekaterina
Agosto 4, 2021

Ginbutangan sing restriksion ang pagbiyahe ni Valentina
Mayo 26, 2023

Ginsugdan ang hearing

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE