Ang mga opisyal sa Europe kag sa United States padayon nga nagakondenar sa nagakatabo nga paghingabot asta subong sa mga Saksi ni Jehova sa Russia.

“Nabalaka gid ang USCIRF sa pagtratar sang Russia kay Dennis Christensen,” siling ni Chair Gayle Manchin, sa mensahe nga ginpagua sang Oktubre 27, 2020. “Maathag gid nga ginasilutan sang pungsod ining makaluluoy nga tawo, nga ang sala gid lang amo ang pagpakigbahin niya sing mahidaiton sa mga hilikuton sang iya relihion. Sa baylo nga kaluuyan, ginkabig sia sang pungsod nga isa ka makatalagam nga kriminal. Isa gid ini ka daku nga inhustisya.”

Si Chair Manchin nagasuporta kay Brother Christensen paagi sa Religious Prisoners of Conscience Project sang USCIRF. Sulitsulit nga ginkondenar sang USCIRF ang sentensia kay Brother Christensen nga anom ka tuig nga pagkapriso.

Sa ila mensahe, ginkondenar man sang USCIRF ang Russia bangod wala sini gintugutan nga hilwayon sing temprano si Brother Christensen. Nagreport ang USCIRF nga “ginhatagan [sia] sang parole sang Hunyo 23, [2020,] pero ini nga desisyon ginpamatukan dayon sang piskal. Gani sa baylo nga buy-an, ginbutang pa si Christensen sa magin-ot nga selda nga para sa mga priso nga ginasilutan kay ginalapas kuno niya ang mga kasuguan sa prisuhan.”

Ang mensahe sang USCIRF natapos paagi sa pagpatuhoy sa 2020 Annual Report sini. Ginkondenar sini nga report ang gobierno sang Russia sa “organisado, padayon, kag daku gid nga mga paglapas sa kahilwayan sa pagsimba” kag ginrekomendar sini nga dapat silutan sang gobierno sang U.S. ang Russia paagi sa pagkilala sini nga isa ka “pungsod nga dapat bantayan.”

Sing kaanggid, sa gintingob nga sulat para sa Permanent Mission of the Russian Federation to the United Nations Office, walo ka mataas nga opisyales sang United Nations Human Rights Council ang nagpabutyag sang ila pagkabalaka sa “padayon nga paghingabot sa mga Saksi ni Jehova sang Russian Federation, sa pagkompiskar sini sang Administrative Center of Jehovah’s Witnesses sa St. Petersburg, kag sa pagdumili sang mga hilikuton sang mga Saksi ni Jehova sa 395 ka lokal nga organisasyon sini sa bilog nga pungsod.” Ginkondenar man sang mga opisyales ang Russia kay wala sini ginasapak ang madamo nga pagpangabay sang mga tawo kag mga organisasyon nga untatan na ang paghingabot.

Ginpaathag sang mga opisyales sang UN nga ang indi maathag nga mga kasuguan sang Russia parte sa extremism “gingamit para dumilian ang bisan ano nga hilikuton sang mga Saksi ni Jehova, pahugon sila, dulaon ang ila privacy paagi sa pagpamahog sang mga pulis kag pag-usisa sang ila puluy-an, imbestigahon ang pila sa ila, kag sa pila ka kaso, para pamatbatan sila nga guilty kag prisuhon.”

“Ang kinamatarong sang mga Saksi ni Jehova nga himuon ang mga hilikuton sang ila relihion ginasuportahan sang article 18 (1) sang ICCPR,” * insister sang mga opisyales. Gani ginpangabay nila ang Russian Federation nga “siguraduhon nga ang 2002 Federal Law on Combating Extremist Activity indi maglapas sa mga kinamatarong sang isa ka tawo nga ara sa konstitusyon parte sa kahilwayan sa paghunahuna, konsiensia, relihion ukon pagpati.”

Ginpakita man sa sulat ang pila ka mapintas nga paghingabot sa aton mga kauturan. Halimbawa, ginsambit sini ang lima ka Saksi halin sa Saratov nga ginkastigo sang Pebrero 6, 2020. Ang sulat nagpaathag: “Ang ginpriso nga mga Saksi ni Jehova masami nga ara sa mabudlay nga mga kahimtangan sa prisuhan, ginamaltratar, ginapintasan, kag gina-torture pa gani bangod sang ila relihioso nga mga pagpati.”

Ang sulat sang mga opisyales nagpatuhoy sa isa pa ka makapasubo nga halimbawa sang paghingabot—gin-torture sang mga pulis sang Russia si Brother Vadim Kutsenko sang Pebrero 10, 2020. Ginpanghiwala sang mga awtoridad sang Russia ang pag-torture kay Brother Kutsenko. Pero ang mga opisyales sang UN indi kumbinsido sa pagpanghiwala sang mga awtoridad sang Russia, kag padayon sila nga “nabalaka gid sa organisado nga paghingabot sa mga Saksi ni Jehova sa bilog nga pungsod paagi sa pagtawag nga krimen sang ila mahidaiton nga mga hilikuton.”

Sugod nga gindumilian kag ginhingabot sang Russia ang mga Saksi ni Jehova sang 2017, gina-monitor na sang Council of Europe’s Committee of Ministers * kon bala ginsunod sang Russia ang duha ka desisyon sang European Court of Human Rights nga nagpamatbat sa Russia nga nakasala sing paglapas sa mga kinamatarong sang mga Saksi ni Jehova. * Gani, ang Committee nagpagua sing desisyon sang Oktubre 1, 2020, diin ginpabutyag nila ang ila “kabalaka parte sa 2017 nga pagdumili kag ang makatulublag nga mga report halin sa nanuhaytuhay nga mga lugar . . . kag bangod sini nga pagdumili, padayon nga ginadakop, ginapamatbatan nga nakasala, kag ginapriso ang mga Saksi ni Jehova bangod lamang sa ila mahidaiton nga paghimo sang mga hilikuton sang ila relihion.”

Para indi masulit ini nga mga paglapas, ang Committee nagrekomendar nga dapat kay-uhon sang Russia ang “kasuguan sini subong kontra sa extremism nga amo ang ginabasihan sa pagdumili kag pagpriso sa mga Saksi ni Jehova bilang kriminal.” Dugang pa, dapat binagbinagon sang Russia “nga dulaon ang pagdumili kag untatan na ang pagpriso bilang mga kriminal sa mga Saksi ni Jehova nga mahidaiton lamang nga nagahimo sang mga hilikuton sang ila relihion.” Sa 2021, usisaon liwat sini nga committee kon bala may ginhimo ang Russia para magbag-o ang sitwasyon.

Sugod sang 2017, masobra na 400 sang aton mga kauturan sa Russia kag Crimea ang ginpatupatuan nga mga extremist. Sobra 210 ka Saksi ang napriso sa sobra 70 ka siudad sa bilog nga Russia.

‘Nagapanawag kita sa ngalan ni Jehova nga aton Dios’ para buligan niya pirme ang aton mga kauturan nga padayon nga makabatas.—Salmo 20:2, 7.