MAYO 20, 2022
RUSSIA

Nabatas sang mga Pamilya ang Paghingabot sa Bulig ni Jehova

I-PLAY

Sa indi madugay, ipahibalo sang Sovietskiy District Court of the City of Oryol ang desisyon sini sa kaso nanday Brother Vladimir Melnik, Brother Vladimir Piskarev, kag Brother Artur Putintsev. Wala pa sing may ginsiling ang piskal kon ano nga sentensia ang gusto niya sa sini nga kaso.

Time Line

Disiembre 8, 2020

Ginkasuhan sanday Brother Melnik, Brother Piskarev, kag Brother Putintsev
Disiembre 9, 2020

Gin-raid sang mga pulis ang mga balay sang walo ka pamilya sang mga Saksi ni Jehova sa Oryol, lakip na ang mga balay sining tatlo ka brother. Gindala sila sa isa ka temporary detention facility
Disiembre 11, 2020

Si Brother Melnik kag Brother Piskarev gindala sa isa ka pretrial detention center
Disiembre 14, 2020

Si Brother Putintsev gindala sa isa ka pretrial detention center
Enero 19, 2021

Ginpahibalo ang mga awtoridad nga si Brother Piskarev may pila ka malala nga balatian pero wala sia gintugutan nga magpaospital kag wala man sia ginhatagan sing bulong
Enero 21, 2021

Gintugutan ang asawa ni Brother Piskarev nga magdala sang bulong para sa iya pero wala sia gihapon gintugutan nga magpaospital
Hunyo 24, 2021

Gin-eksamin si Brother Piskarev sa ospital, kag nahibaluan nga na-stroke sia gali. Ginbalik gihapon sia sa pretrial detention center bisan sang iya balatian
Oktubre 29, 2021

Gin-akusar ini nga mga brother nga nagaorganisar sang mga hilikuton sang isa ka extremist nga organisasyon
Enero 31, 2022

Nag-umpisa ang hearing

Impormasyon Parte sa Ila

Vladimir Melnik

Natawo: 1965 (Donetsk, Ukraine)

Biograpiya: Nangin soldado sia. Sang ulihi, nag-obra sia bilang engineer

Napangasawa niya si Irina sang 1987. May tatlo sila ka bata nga babayi. Napatay ang ila bata nga lalaki sang 1991

Nagdaku sia nga isa ka atiesta. Sia kag ang iya asawa nangin interesado sa Biblia sang gintun-an nila ang kabuhi ni Jesus. Nabawtismuhan sia sang 1992

Ang Ginsiling sang Iya Asawa nga si Irina a

Sa ano nga mga paagi nagbulig si Vladimir sa iban samtang gina-detain sia?

Padayon nga nagahatag si Vladimir sing mga instruksion para sa family worship sa amon mga bata nga babayi kag sa akon [paagi sa iya mga sulat]. Ginahimo niya ini paagi sa mga binalaybay, parabola, ilustrasyon, hampang, crossword puzzle, kag mga Bible quote.

Gintun-an pa gani niya sa Biblia ang isa ka priso. . . . Ining lamharon nga lalaki ginsaylo na sa iban nga siudad. Nagsiling si Vladimir nga ginasugid man sining lamharon nga lalaki sa iban nga priso didto ang natun-an niya.

Vladimir Piskarev

Natawo: 1956 (Karpinsk, Sverdlovsk Region)

Biograpiya: Nag-obra sia bilang engineer. Napangasawa niya si Tatyana sang 1976. May isa sila ka bata nga lalaki kag isa ka bata nga babayi. Nagtuon sila sang iya asawa sang Biblia upod sa mga Saksi ni Jehova sang mabal-an nila ang kamatuoran parte kay Jesus. Nabawtismuhan sia sang 1995

Ang Ginsiling sang Iya Asawa nga si Tatyana b

Ano ang nakabulig sa imo bana nga mabatas ang pag-detain sa iya?

Nagapati si Vladimir nga pagpakamaayo gid kag pagpalig-on kon may maistorya sia nga madamo sing pamangkot. Siling niya, “Makalilipay gid nga mangin masako sa hilikuton sang Ginuo, bisan sa detention center!” Bisan diin ang akon bana, pirme niya ginakanta ang aton mga ambahanon sa Ginharian. Nanamian gid sia sa kanta nga “Padayon Kita nga Magbatas.” Nagapabakod pa gid ini sang iya pagtuo, kag nagabulig sa iya nga padayon nga mangin matutom kay Jehova. Pila ka beses nga ginsulat niya sa akon ang mga tinaga sa sini nga kanta: “Pagtuo pangapinan./Magmabinatason./Gugma sang Dios saligan./Gani padayon nga magmatutom.”

Artur Putintsev

Natawo: 1970 (Chita, Trans-Baikal Territory)

Biograpiya: Sia ang kamagulangan sa anom ka mag-utod. Nag-obra sia bilang elektrisyan, mangunguma, kag drayber sa taxi. Napangasawa niya si Lyudmila sang 1993. Nabawtismuhan sia sang 2005

Ang Ginsiling sang Iya Asawa nga si Lyudmila c

May madumduman ka bala nga higayon nga nabatyagan mo nga ginbuligan ka gid ni Jehova?

Sang gin-aresto kag gin-detain ang akon bana, ginkumpiskar sang imbestigador ang tanan namon nga gadyet, lakip na ang amon mga telepono. Nagaisahanon lang ako [kag indi ko makontak ang bisan sin-o]. Na-shock gid ako, gani nangamuyo ako kay Jehova para buligan niya ako. Nangayo ako sang iya bulig kon paano ko makontak ang mga kauturan kag masugiran sila kon ano ang natabo. Bag-o lang gid nakahalin ang salakyan nga nagdala kay Artur sang nag-abot ang mga kauturan. Ginpalig-on nila ako kag ginhatagan sang telepono. Wala gid nila ako ginbiyaan sa sulod sang isa ka tuig, kag asta subong, padayon nila ako nga ginaatipan. Kabalo ’ko nga sabton ni Jehova ang mga pangamuyo sa husto nga tion kag naintiendihan gid niya ang akon ginabatyag.

Bisan indi makaupdanay subong ang mga miembro sini nga mga pamilya, napaumpawan kita kay nahibal-an naton nga wala sang makapugong para mabaton nila ang pag-atipan kag proteksion ni Jehova.—Roma 8:38, 39.

a b c Bangod ara subong sanday Brother Melnik, Brother Piskarev, kag Brother Putintsev sa pretrial detention, indi sila puede interbyuhon.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE