Sa indi madugay, ipahibalo sang Tsentralniy District Court of Chelyabinsk ang desisyon sini sa kaso ni Dmitriy Vinogradov. a

Dmitriy Vinogradov

• Natawo: 1963 (Chelyabinsk)

• Biograpiya: Sang nagdiborsio ang iya mga ginikanan, ang iya iloy ang nagpadaku sa iya. Mahilig sia mag-chess kag sang ulihi nag-obra sia bilang isa ka chess master. Nagatudlo sia sa isa ka pribado nga chess school. Napangasawa niya si Zhanargul sang 1990. May apat sila ka bata, kag ang duha ka kamanghuran kaupod pa nila sa ila balay

  Ginpaligban niya kon ngaa ginahalitan sang maalam nga mga tawo ang planeta kag ang iban nga mga tawo. Nakita niya ang sabat sa Biblia. Ginbawtismuhan sia bilang isa sa mga Saksi ni Jehova sang 2014

Sang ulihi nga mga binulan sang 2018, may mga agent nga ginmanduan nga magpakunokuno nga interesado sa Biblia kag makig-istorya kay Dmitriy. Sang Enero 2020, ang mga awtoridad nagsiling nga madamo na sila sing natipon nga ebidensia para kasuhan sia. Pagligad sang duha ka bulan, ginsulod sang mga pulis ang iya balay kag gin-raid ang iya apartment bisan pa wala si Dmitriy didto.

Buron ang panan-aw ni Dmitriy kag may high-blood sia. “Ang akon relasyon sa Dios wala nagadepende sa akon panglawas,” siling niya. “Nalipay gid ako nga makapanaksi ako sa korte, kag ginapabugal ko gid ini.”

Si Dmitriy kag ang iya pamilya regular nga nagabasa sing Biblia kag nagapamalandong sa sini. Nagahanda man sila, nagatambong, kag nagakomento sa mga miting. Sa sulod sang mga tinuig, amo ini ang nakabulig sa iya pamilya nga mangin malapit pa gid kay Jehova kag sa isa kag isa. Gani handa sila nga magbatas sa tion sang paghingabot. Nagsiling pa gid sia: “Ang isa sa mga nakabulig gid sa amon amo ang pangamuyo sang mga kauturan. Ginapamatian ni Jehova ang pangamuyo sining mga matarong, kag grabe gid nga pagpakamaayo ang nabaton namon halin kay Jehova.”

Madamo gid kita sing natun-an sa aton mga kauturan nga malipayon kag may kaisog nga nagabatas sang mga paghingabot sa ila. Ginadumdom gid naton sila pirme kag nagaugyon gid kita sa ginasiling sang 2 Tesalonica 1:4: “Ginapabugal namon kamo sa mga kongregasyon sang Dios bangod sang inyo pagbatas kag pagtuo bisan pa sang mga paghingabot kag mga kabudlayan nga inyo ginaantos.”