AGOSTO 20, 2021
RUSSIA

Nabatyagan sang Tatlo ka Brother kag Isa ka Sister sa Dagestan ang Bulig ni Jehova sang Gin-detain Sila

I-PLAY

Time Line

Sa indi madugay, ipahibalo sang Kirovksiy District Court of Makhachkala, sa Republic of Dagestan, ang desisyon sini sa kaso nanday Brother Marat Abdulgalimov, Brother Arsen Abdullaev, Brother Anton Dergalev, kag Sister Mariya Karpova. a Wala pa sing may ginsiling ang piskal kon ano nga sentensia ang gusto niya sa sini nga kaso
Mayo 27, 2020

Pagkatapos sang 362 ka adlaw, sanday Marat, Arsen, Anton, kag Mariya ginpagua sa pretrial detention center kag gin-house arrest na lang
Hunyo 4, 2019

Ang Sovetskiy District Court of Makhachkala nagmando nga ibutang sila nga apat sa pretrial detention center
Hunyo 1, 2019

Gin-raid sang mga agent sang FSB, ang secret police sang Russia, ang 13 ka balay sang mga Saksi ni Jehova sa Dagestan
Mayo 27, 2019

Ginpasakaan sang FSB sa Dagestan sing kaso kriminal sanday Marat, Arsen, Anton, kag Mariya

Impormasyon Parte sa Ila

Marat Abdulgalimov

Natawo: 1991 (Makhachkala, Republic of Dagestan)

Biograpiya: May tatlo sia ka utod. Nanamian sia mag-soccer. Nakatuon man sia magpang-welding, kag subong nagaobra sia sa isa ka balaligyaan sing sapatos

Halin sang bata pa sia, mahilig na sia magbasa sang Biblia. Nanamian gid sia makig-upod sa mga tawo nga nagasunod sa Cristo kag nagapalangga sang ila mga isigkatawo. Nabawtismuhan sia bilang isa sa mga Saksi ni Jehova sang 2013

Ang Iya Ginsiling

Ano ang nakabulig sa imo nga mabatas ang halos isa ka tuig nga pagkapriso sa detention center?

Ginpamalandungan ko ang akon sitwasyon kag ginkumparar ko ini sa natabo kay Jose. Puede ako sentensiahan nga mapriso sing asta sa pulo ka tuig. Pero si Jose gani napriso sing 13 ka tuig. Sa bulig ni Jehova, padayon man ako nga mangin matutom bisan sang akon sitwasyon. Nakita ko kon paano ginasabat ni Jehova ang akon mga pangamuyo, gani gintugyan ko ang tanan ko nga lulan sa iya. Ang Salmo 55:22 nakabulig gid sa akon nga mabatas ini nga kabudlayan. Ini nga teksto nagapromisa nga kon itugyan ko kay Jehova ang akon lulan, alay-ayon niya ako. Gani, amo gid sina ang ginhimo ko.

Arsen Abdullaev

Natawo: 1979 (Kasumken, Republic of Dagestan)

Biograpiya: Pamatan-on pa lang sia, nanamian na sia mag-volleyball kag magbasa sing mga libro. Nagtuon sia maghimo sing alak kag may degree sia sa sini. Manugkay-o man sia sang heating kag plumbing

Sang primero, indi gusto sang mga ginikanan ni Arsen ang iya pagtuon sing Biblia. Pero nagpadayon si Arsen kag nabawtismuhan sia bilang isa sa mga Saksi ni Jehova sang 2000. Napangasawa niya si Suat. May isa sila ka bata nga lalaki

Ang Iya Ginsiling

Paano mo nabatuan ang pagluya sang buot sang ara ka sa detention center?

Daku gid ang nabulig sang aton mga kanta. Kanami sang pamatyag ko kon makakanta ako. Pirme ko ginakanta ang Ambahanon 45, nga “Ang Ginapamalandungan sang Akon Tagipusuon.” Isa ini sa mga paborito ko. Natural lang nga kon kis-a nagaluya man ang akon buot, ginakapoy ako, natak-an, kag gusto ko lang magpahimunong. Pero, wala ko gid ginapasugtan nga maglapaw sa isa ka adlaw nga amo sina ang akon pamatyag. Sa sina nga mga tion, ginasilingan ko ang akon kaugalingon: ‘Buas pagbugtaw mo, OK na ang tanan. Madula man lang na ang imo mga ginabatyag subong. Magpakabakod ka kay kinahanglan ka sang imo pamilya kag sang mga kauturan.’

Anton Dergalev

Natawo: 1985 (Rostov-on-Don, Rostov Region)

Biograpiya: Ang nanay lang ni Anton ang nagpadaku sa iya kag sa iya utod nga lalaki. Gintudluan sia sang iya nanay kag lola nga sundon ang mga prinsipio sa Biblia. Nag-obra sia bilang elektrisyan kag landscape designer. Nabawtismuhan sia bilang isa sa mga Saksi ni Jehova sang 2002

Ang Iya Ginsiling

Paano ka ginbuligan ni Jehova sa sini nga pagtilaw?

Madamo gid sing ginhimo ang mga kauturan para maatipan kami. Ang isa ko ka kaupod sa selda nagsiling nga pagligad sang pila ka bulan, indi na ako pagpadal-an sang akon mga abyan sang suplay sang akon mga kinahanglanon. Pero natingala gid sia kay sigesige ako nga makabaton sing suplay bisan pagligad sang anom ka bulan asta sa halos isa ka tuig pa gani!

Ano ang masiling mo nga makabulig sa iban nga makahanda engkaso nga hingabuton man sila?

Ang masiling ko amo nga indi gid mag-untat sa pagtambong sa mga miting. Nahidlaw na ako magtambong sa mga miting. Panginpusli ang tanan nga kahigayunan nga ginaaman ni Jehova. Padayon nga pabakura ang imo relasyon kay Jehova kag indi mahadlok sa bisan ano nga matabo. Kaupod naton pirme si Jehova!

Mariya Karpova

Natawo: 1980 (Magadan, Magadan Region)

Biograpiya: May duha sia ka utod nga lalaki. Mahilig sia mag-ski, magbiyahe, kag magbasa. May degree sia sa veterinary medicine

Nakita niya sa Biblia ang sabat sa iya mga pamangkot parte sa palaabuton kag nagdesisyon sia nga mangin isa sa mga Saksi ni Jehova. Nabawtismuhan sia sang 1998

Ang Iya Ginsiling

Ano ang nakabulig sa imo nga indi mabalaka sing sobra sang ara ka sa detention center?

Madamo ako sing nadumduman nga mga teksto sa Biblia kag ginsulat ko ina sa akon notebook. Ini nga mga teksto ang nagpalig-on sa akon sa sulod sang tatlo ka bulan nga wala ako sing Biblia. Napabakod man ako sang Filipos 4:6, 7. Kon may bag-o nga problema nga mag-abot, ginabuksan ko ang akon notebook, ginatan-aw ina nga teksto, kag ginasilingan ko ang akon kaugalingon: ‘Indi kamo magkabalaka sa bisan ano nga butang.’ Dayon, wala na ako nabalaka.

Ngaa makasiling ka nga ginbuligan ka gid ni Jehova sa sining mabudlay nga sitwasyon?

Una, ginbuligan ako ni Jehova sang mapatay si Tatay [samtang ara ako sa pretrial detention]. Wala ko ini mabalitaan lang, kundi si Nanay mismo ang nagsugid sa akon sang natabo kay ginpasugtan ako sang imbestigador nga maistorya si Nanay sa telepono. Dayon, ginkadtuan sang akon duha ka suod nga abyan si Nanay kay wala ako sa iya luyo. Nagbiyahe pa sila para makadtuan lang si Nanay kag maupdan asta sa lubong. Ara man ang mga kauturan. Ginatawgan nila si Nanay, ginasulatan, ginapadal-an sing mga kard, kag ginabuligan nila sia sa iya mga kinahanglanon para makabiyahe sia kag maka-attend sa akon mga hearing.

Nagasalig gid kita nga himuon ni Jehova nga Dios ang tanan nga kinahanglanon para maproteksionan kag mabuligan ang iya katawhan. Himuon gid niya ina suno sa kahulugan sang iya ngalan.—Exodo 3:14.

a Ang petsa sang desisyon sang korte wala pirme ginapahibalo sing abanse.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE