MAYO 30, 2023
RUSSIA

Nabatyagan sang mga Kauturan sa Teykovo ang Bulig ni Jehova

I-PLAY

Sa indi madugay, ipahibalo sang Teykovskiy District Court ang desisyon sini sa kaso nanday Brother Sergey Galyamin, Brother Anatoliy Lyamo, Brother Vladimir Spivak, kag Brother Aleksandr Vasichkin. Wala pa sing may ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Sergey Galyamin

Natawo: 1967 (Teykovo, Ivanovo Region)

Biograpiya: Papangay-o sang sapatos ang iya negosyo

Napangasawa niya si Lyudmila sang 1991. May tatlo sila ka bata nga babayi

Nalipay gid sia sang natun-an niya nga may ngalan ang Dios. Nag-attend sia sa miting sang mga Saksi ni Jehova kag natalupangdan niya nga kabuot sang mga Saksi. Nakabulig ini sa iya nga makumbinsi nga amo ini ang kamatuoran. Nabawtismuhan si Sergey sang 2001 kag si Lyudmila sang 2002

Ang Iya Ginsiling

Ano nga importante nga leksion ang natun-an mo sa sining mabudlay nga sitwasyon?

Sang nabal-an ko kon paano ginatratar ang aton mga kauturan, naakig gid ako. Nabalaka man ako sa posible matabo sa akon. Pero nadumduman ko ang ginsiling sa Salmo 73:26: “Mahimo magluya ang akon lawas kag ang akon tagipusuon, apang ang Dios amo ang igang sang akon tagipusuon.” Amo gid ini ang kinahanglan ko. Narealisar ko nga wala gid sang pulos kon imadyinon ko ang tanan nga malain nga butang nga puede matabo sa akon. Ang pinakamaayo nga mahimo ko amo ang pagpabakod sang akon relasyon kay Jehova kag pagsalig sa iya sing bug-os.

Anatoliy Lyamo

Natawo: 1963 (Pogar, Bryansk Region)

Biograpiya: Nagaobra sia sa konstruksion sang mga subway

Napangasawa niya si Galina sang 1993. May duha sila ka bata kag may duha ka apo

Ginapangita niya ang kamatuoran kag nagdayaw sia kay maathag gid ang ginasiling sang Biblia. Nabawtismuhan si Anatoliy sang 1995 kag si Galina sang 1997

Ang Iya Ginsiling

Paano ka ginbuligan sang pareho mo nga mga Saksi?

Mas palangga kag mas ginapabaloran ko na ang akon mga kauturan subong. Kulang ang mga tinaga para mahambal ko kon paano ako ginbuligan ni Jehova paagi sa ila. Halin sang gin-imbestigahan ako, nakaatubang ako sang madamo nga kabudlayan, pero gingamit ni Jehova ang mga kauturan para atipanon ang akon pamilya. Nagkadto man sila sa korte sang gin-hearing ako para magsuporta, bisan pa nagakinahanglan gid ini sang daku nga kaisog. Kag kada adlaw, makabaton ako sang mga sulat nga nagasiling nga ginapangamuyo gid nila ako kag ang akon pamilya. Nakabulig ini sa akon nga palig-unon ang iban nga ara man sa mabudlay nga mga sitwasyon.

Vladimir Spivak

Natawo: 1955 (Litin, Ukraine)

Biograpiya: Isa sia ka soldado antes sia nangin isa sa mga Saksi ni Jehova

Napangasawa niya si Nellie sang 1979. Una si Nellie nga nagpa-Bible study. Upod sila nga nag-attend sa kombension sang mga Saksi ni Jehova sang 1992. Nagdayaw si Vladimir sa iya nakita kag nabatian. Nabawtismuhan si Nellie sang 1994 kag si Vladimir sang 1997

Ang Iya Ginsiling

Ano ang nakabulig sa imo nga mabatuan ang pagluya sang buot?

Ang isa ka butang nga nahidlawan ko gid amo ang pag-attend sa mga asembleya kag mga kombension. Bangod sini kag sa iban pa nga rason, kon kaisa nagaluya ang akon buot. Pero bal-an ko nga wala ako nagaisahanon. Si Jehova kag ang akon pinalangga nga mga kauturan nagabulig gid pirme sa akon. Sigurado ako nga pirme gid ako suportahan, proteksionan, kag buligan ni Jehova para mabatas ini nga mga pagtilaw.

Aleksandr Vasichkin

Natawo: 1969 (Bryansk, Bryansk Region)

Biograpiya: Isa sia ka soldado antes sia nangin isa sa mga Saksi ni Jehova. Sining karon lang, nag-obra sia bilang groundskeeper

Napangasawa niya si Nataliya sang 1993. May duha sila ka bata

Nagdayaw gid sia sa kaayo nga iya naeksperiensiahan sang nag-attend sia sa miting sang mga Saksi ni Jehova. Dungan sila nga nagpa-Bible study sang iya asawa. Nabawtismuhan si Nataliya sang 1994 kag si Aleksandr naman sang 1995

Ang Iya Ginsiling

Ano ang nakabulig sa imo nga indi mabalaka sing sobra parte sa pagtilaw nga imo ginabatas?

Natalupangdan ko nga kon maluoy ako sa akon kaugalingon, nagaluya ang akon buot. Imbes nga pamensaron kon ngaa nagakatabo ini sa akon, nagapokus ako sa pribilehiyo nga makapanaksi para Jehova. Ginapahanumdom ko man ang akon kaugalingon nga ang akon ginaatubang subong isa lang ka pahina sa libro sang akon kabuhi. Sa indi madugay, masaylo na ako sa masunod nga pahina. Kon padayon ako nga magmatutom, mangin wala sing katapusan ang akon mabakod nga kaangtanan kay Jehova kag sa akon mga kauturan.

Nahibaluan naton nga bisan ano pa nga pagtilaw ang aton maatubang sa sining sistema sang mga butang, temporaryo lang ini kon ikumparar sa wala katapusan nga pagpakamaayo nga ihatag ni Jehova sa iya matutom nga mga alagad.—2 Corinto 4:17, 18.

Time Line

Abril 10, 2020

Ginsugdan ang kaso
Abril 11, 2020

Gin-raid ang ila mga balay
Abril 16, 2020

Ginbutangan sing restriksion ang ila pagbiyahe
Pebrero 2, 2023

Ginsugdan ang hearing

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE